په هرات ولایت کې د ګوزڼ (پولیو) ضد واکسین پیل کېدو سره به د دې ولایت په مرکز او ولسوالیو کې ۷۵۸ زره له پنځو کالونو کم عمره ماشومانو ته واکسین ورکړل شي.
د هرات روغتیایي چارواکي وايي، د پولیو واکسین په برخه کې جدي دي، خو په دې برخه کې د خلکو همکاري هم مهم ده.
د هرات عامې روغتیا ریاست مرستیال غلام محمد حنیفي وايي:« لکه څرنګه چې په جریان کې یاست، دا په ۲۰۲۵ کال د ټول افغانستان پر کچه د پولیو دویم کمپاین دی. ټاکل شوې په هرات ولایت کې ۷۵۸ زره له پنځو کالو کوچني ماشومان هم واکسین شي.»
په همدې حال کې د هرات کډوالو چارو ریاست مسوولان ډاډ ورکوي چې هېواد ته د راستنېدونکو کډوالو لپاره يې ګرځنده ټیمونه ټاکلي، ترڅو هېواد ته له ګاونډیو هېوادونو د دې فلج کوونکي ویروس د لېږد مخنیوی وشي.
د هرات کډوالو او راستنېدنکو چارو ریاست د کډوالو د حقونو ملاتړ مسلکي غړی امرالله حبیبي وايي:« موږ د هغو ټولو راستنېدونکو کډوالو ته د واکسین ورکولو چمتوالی لرو چې له ایران او پاکستان راستنېږي. زموږ د ټیم ټول غړي چمتو دي چې دغو کسانو ته واکسین ورکړي. همدارنګه د عامې روغتیا ریاست په دې اړه د کډوالو او راستنېدونکو چارو له ریاست سره پوره همغږي لري.»
خلک هم له ګوزڼ سره پر جدي مبارزې ټینګار کوي او له کورنیو غواړي چې له پنځو کالو کم عمر لرونکي ماشومان واکسین کړي.
د هرات اوسېدونکی فقیر احمد وايي:« د هرات له ټولو خلکو او کورنیو غوښتنه کوم چې په دې پروسه کې له واکسیناتورانو سره همکاري وکړي او خپل ماشومان له فلج وژغوري.»
د هرات یو بل اوسېدونکی علي احمد وايي:« دا چې د یوې شېبې غفلت له امله یو عمر پښېماني ولرو، ښه ده چې خپلو ماشومانو ته یوه قطره واکسین ورکړو، ترڅو ټول عمر هوسا واوسو. که دا کار ونه کړو، ښايي ماشومان فلج شي. نو له کورنیو غوښتنه کوم چې په دې اړه تنبلي ونه کړي او ماشومان واکسین کړي.»
هرات کې د ګوزڼ ضد واکسین کمپاین داسې مهال پيل کېږي چې تازه یو شمېر نړیوالو روغتیایې بنسټونو په دې برخه کې د بودیجې د کمښت امله اندېښنې ښودلې او خبرداری یې ورکړی چې د بودیجې دا کموالی به د پولیو مبارزه اغېرمنه کړي.
