د خوست ولايت روغتیایي مسوولین وايي، په وروستيو درېيو مياشتو کې په دې ولایت کې نږدې ۱۰زره ښځې او ماشومان پر خوارځواکۍ اخته شوي.
د دې ولایت د عامې روغتيا ریاست چارواکي که څه هم د یادې ناروغۍ د مخنیوي په برخه کې د هڅو ډاډ ورکوي، خو د خلکو خراب اقتصادي وضعيت او په لرو پرتو سيمو کې د روغتيايي خدمتونو کمښت د دې ستونزې اصلي لاملونه ګڼي.
د خوست عامې روغتیا رییس ډاکټر حاجي احمد مجاهد وايي: « دا ستونزې مو له وزارت سره شریکې کړې دي او دوی به په دې اړه پرېکړه کوي. خبره دا ده چې ځینې ساحې ډېرې لرې دي او رسېدنه ورته نه کېږي، بله دا چې خلک هم بېوزله دي، هرڅوک نقلیه وسایط نه لري، ترڅو کلینیکونو ته مراجعه وکړي.»
د خوست ملکي روغتون د خوارځواکو ماشومانو واټ د ډاکټرانو په خبره، د یادې ناروغۍ د مخنیوي په برخه کې لاهم د دې ولایت پر کچه د بشپړو وسایلو او خدماتو په تړاو ستونزې موجودې دي.
دوی زیاتوي، د خوارځواکۍ ناروغي د مخنیوي لپاره دې کورنۍ هم صحي خواړه وخوري او خپلې روغتیا ساتنې ته دې پام وکړي.
ډاکټر ظفرخان حیدرخېل وايي: « د خوارځواکۍ واټ کې ستونزې لرو او دا واټ کوچنی دی خو ناروغان ډېر دي، نو ښه خبر دا ده چې د دې لپاره جلا واټ ولرو. خوارځواکي د امراضو مجموعه ده او د دې لپاره بشپړو وسایلو ته اړتیا ده.»
اخوا د خوست ولایت اوسېدونکي له سرپرست حکومته غواړي چې د روغتيايي خدمتونو د پياوړتيا ترڅنګ د خلکو د اقتصادي ودې او لپاره یې د کاري فرصتونو رامنځته کولو په تړاو عملي ګامونه پورته کړي، ترڅو په مرکز او لرې پرتو سیمو کې خلک په اسانۍ سره اړینو خوراکي توکو او روغتیایي خدماتو ته لاس رسۍ پیدا کړي.
ټولنیز فعال رشیدالله همدرد وايي: « موږ له خپلو شتمنو خلکو، ملي موسسو او نړیوالو ادارو هیله لرو چې دغو کسانو ته رسېدنه وکړي، ځکه دا زموږ د ټولنې خلک دي.»
ټولنیز فعال سید شاه محبت وايي: « له دولت او په ځانګړې توګه له عامې روغتیا وزارت غوښتنه کوو چې لرې پرتو سیمو ته روغتیايي خدمات ورسوي او ځوانانو ته د کار فرصتونه پيدا کړي.»
په خوست کې د روغتیایي خدماتو د کمښت او بېوزلۍ له امله رامنځته شوې خوارځواکۍ په اړه دا راپورونه په داسې حال کې ورکول کېږي چې تازه د خوړو نړیوال سازمان ویلي، د سږ کال په اوړي کې به افغانستان کې نږدې ۳ میلیونه کسان ژوند ژغورونکو مرستو ته اړتیا ولري.
