په ننګرهار کې د ختیځ زون پر کچه د یوه ستر معیاري لابراتور ودانۍ چې د ملګرو ملتونو پراختیايي پروګرام(یو.اېن.ډي.پي) په ۲۷ میلیونو افغانیو مالي مرستې جوړه شوې، ګټې اخیستنې ته وسپارل شوه.
د ننګرهار روغتیا ریاست مسوولین د دې لابراتور د ګټې اخیستنې مراسمو کې وویل، د یاد لابراتور په فعالیت سره به ډېر شمېر ناروغان د ناروغیو د تشخیص لپاره ګاونډیو هېوادونو ته له تګ خلاص شي.
د ننګرهار عامې روغتیا رییس مولوي امین الله شریف وايي: « په دې باندې ټولټال ۲۷.۵ میلیونه افغانۍ لګښت راغی چې یوازې ۲۰ میلیونه یې د ودانۍ په جوړېدو لګول شوې دي. په دې لابراتوار کې به د هغو ناروغیو تشخیص کېږي چې له دې وړاندې د دې ځای په روغتونونو کې نه کېدل. له دې وروسته به زموږ خلک مجبور نه وي چې د ناروغیو د تشخیص لپاره بل ځای لاړ شي.»
په ورته مهال، د روغتیا وزارت چارواکي وايي، د روغتیا برخه کې ځان بسیاینې ته د هېواد رسولو هڅې روانې دي.
د عامې روغتیا وزارت سرپرست مولوي نور جلال جلالي وايي: « زموږ ټولو هدف او آرمان دا دی چې موږ په ځانګړې توګه روغتیا برخه کې خودکفا او پر خپلو پښو ودرېږو. په همدې موخه د دې لابراتوار کارونه بشپړ شول.»
د ننګرهار اوسېدونکي هم د دې لاربراتوار جوړېدو ته خوشاله دي، خو د ژر فعالیت او په دوامدار ډول د دې لابراتوار د اړتیاوو د پوره کېدلو او حکومتي څار غوښتنه کوي.
د ننګرهار یو اوسېدونکی وايي: « دا ډېر د خوښۍ ځای دی چې په جلال آباد کې دا ډول لابراتوار جوړېږي. موږ له دې وړاندې بهر ملکونو ته تلوو او ډېر په تکلیف وو. زموږ ناروغان په تورخم کې له حده زیات په عذاب وو.»
د ننګرهار یو بل اوسېدونکی وايي: « دا خلک به د معایناتو لپاره کابل، پېښو یا نورو بهرنیو هېوادونو ته تلل او په دې اړه له سختو ستونزو سره مخ وو. له دې وروسته به ټول معاینات دلته اجراء کېږي.»
د سیمې یو بل اوسېدونکی وايي: « خدای دې نور هم توفیق ورکړي چې دلته ښه ډاکټران راولي او سم معاینات وشي. د دې ځای جوړېدل د ټولو خلکو لپاره ښه دی.»
دا لابراتور داسې مهال ګټې اخیستنې ته سپارل کېږي چې لاهم ډېر شمېر ناروغان د خپلو ناروغیو د تشخیص لپاره ګاونډویو هېوادونو ته ورځي او په دې برخه کې د وېزو پر ستونزو سربېره، له ګڼو نورو ستونزو او درنو مالي لګښتونو سره هم مخامخ کېږي.
