د عامې روغتیا وزارت د پلان او پالسۍ معین په فراه کې د روغتیایي خدمتونو د کموالي په اړه د خلکو ستونزې او شکايتونه مني، خو په خبره يې سرپرست حکومت هڅه کوي چې دا ستونزې حل کړي.
محمد حسن غیاثي وایي، په نوي کال کې به د فراه په يو شمېر ولسوالیو کې پنځه نوي روغتیایي مرکزونه جوړ شي چې له ۳۰ تر ۴۵ بسترونو ظرفیت به ولري او په دې توګه به د خلکو ستونزې په نسبي توګه راکمې او روغتيايي خدمتونو ته به لاسرسی زیات شي.
غیاثي زیاتوي:« موږ پلان لرو چې په پنځو ولسوالیو کې عمومي روغتونونه جوړ کړو. دا روغتونونه به له ۳۰ تر ۴۵ بسترونو ظرفیت ولري. زه فکر کوم د روان کال تر پایه به په دې بریالي شو چې دغه پروژې ګټه اخیستنې ته وسپارو. په دې سره به زموږ په روغتونونو کې پر فعالو بسترونو ۱۲۰ نور بسترونه هم ورزیات شي.»
بله خوا، یو شمېر ناروغان او د هغوی خپلوان د ولسوالیو په روغتیایي مرکزونو کې د درملو او طبي وسایلو د کمښت له امله شکایت کوي.
دوی وايي، ډېری ناروغان اړ دي چې د درملنې لپاره د فراه مرکز ته لاړ شي، خو د دوی په خبره مرکزي روغتون کې هم له ګڼه ګوڼې او د امکاناتو له کمښت سره مخ دی.
د غلام رسول په نوم د یوه ناروغ پایواز وايي:« موږ له لرې ځایونو د فراه مرکز ته راځو. که څوک خپل موټر ونه لري، په لارو زښت ډېر په تکلیف کېږي، کرایه هم زیاته ده او لاره خرابه ده. دلته هم درمل، امکانات او ډاکټران کم دي.»
له یوه بل ناروغ سره مل کس عبدالوارث وايي:« که په روغتونونو کې کلینیکونه زیات شي، دا ډېره ښه خبره ده؛ ځکه چې دلته به د ناروغانو ګڼه ګوڼه کمه شي. موږ په انار دره ولسوالۍ کې د ګڼ شمېر کلیو لپاره یوازې یو لومړنی کلینیک لرو. هلته د ناروغانو شمېر زیات خو د درملو او امکاناتو کچه کمه ده. که نوي روغتونونه جوړ شي، ډېر به ښه شي.»
د فراه ولايتي روغتون ۱۲۰ بسترونه لري، خو هره ورځ شاوخوا ۲۰۰ ناروغانو ته خدمات وړاندې کوي.
د فراه اوسېدونکي هیله من دي چې له نویو روغتیایي مرکزونو سره به په دې ولایت کې د خلکو روغتیایي ستونزې څه نا څه کمې شي.
