که څه هم پیرکي هوسانه خواړه دي، خو اوس نږدې د کابل ښار په هره کوڅه او واټ کې پخیږي او پلورل کېږي.
په دې وروستیو کې نه یوازې پلازمېنې کابل کې بلکې په نورو ښارونو کې هم د سړک پر سر د تیارو شویو خوراکي توکو او خوړو پېر او پلور زیات شوی او تر ډېره، پیرکي (بولاني) شورنخود، منتو، آشک، سوپ، ښوروا، کبابونه او نور ډول ډول خواړه پلورل کېږي.
د کابل ښار ټکسي چلوونکی عمران د دغو خوړو په اړه وايي: « زه ټکسیوان یم، هر وخت دلته راځم، د دې ورور مشتري یم او پیرکي خورم.»
پیرکي پلورونکی مؤمن وايي: « نظافت د ایمان یوه برخه ده. وروره! زه د پیرکیو کچالو، ګندنه او نور اړوند مواد په کور کې چمتو کوم، بیا یې دلته جوړوم او تر پخولو وروسته یې خرڅوم.»
خو آیا دغه خواړه پاک او صحي دي، د پاکۍ ساتلو او روغتیايي ستونزو ته یې څومره پاملرنه کېږي؟
د عامې روغتیا وزارت په همدې اړه هغو سلګونو خوړو پلورونکو ته درې ورځنی سیمینار جوړ کړی چې د کابل ښار پر واټونو خوراکي توکي او خواړه پلوري.
د عامې روغتیا وزارت چارواکي وايي، په دې سیمینار کې خوړو پلورونکو ته ښودل کېږي چې څنګه کولی شي پاک او صحي خواړه چمتو او بیا یې پر خلکو وپلوري.
د عامې روغتیا وزارت د خوړو د خوندیتوب کمېټې مشر نعیم الله ایوبي وايي: « له تاسو ټولو ګډونوالو مو هیله ده، هغه تدریس او مالومات چې دلته درکول کېږي، په عملي ساحه کې یې رعایت کړئ. موږ او تاسو باید د امراضو د خپرېدو لامل نه شو. بولاني او یو شمېر نور خواړه په غوړو کې پخېږي او هغه غوړي ډېر زیانونه لري چې په پرله پسې او مکرر ډول په کې خواړه سره شي.»
کابل ښار کې پیرکي پلورونکی اسدالله وايي: « دلته خلک راځي په عملي او نظري ډول درس وايي او ګوري یې. هر چا کراچۍ جوړه کړې او له دې وړاندې په دې نه پوهېدل، دا خبرې نه وې؛ خو اوس چې درس لولي، په دې به پوه شي چې څنګه یې عملي کړي.»
د کابل ښار پر واټونو پیرکي پلورونکي وايي، د پيرکیو چمتو کولو او پخولو پرمهال پاکوالي او صحي برخې ته زیاته پاملرنه کوي.
پیرکي پلورونکی ضیاالدین وايي: « زه خپله تنوري پیرکي پخوم. زموږ پیرکي دوه ډوله دي، د کچالانو او ګندنې څخه جوړ او د کدو پیرکي. زموږ پېرودونکي ډېر دي، ځکه دا پیرکي په غوړو کې د پاخه شویو پیرکیو په پرتله ښه دي. خلک دا پیرکي ځکه ډېر کاروي چې صحي دي.»
د کابل ښاره ککړې هوا او په آزاده فضا کې د پیرکیو پخولو ته په کتو، د دغو خوړو پاکوالی نه شي تضمین کیدای، خو پیرکي پلورونکي بیا هم ټینګار کوي چې دوی یې صحي برخې ته ډېره پاملرنه کوي.
