د بلخ ولایت البرز ولسوالۍ هغه سیمه چې نفوس یې له ۱۰۰ زرو تنو اوړي خو لاهم د خپلو ناروغانو د درملنې لپاره مجهز روغتیایې مرکز نه لري.
د سیمې اوسېدونکي وایي، له لرې پرتو سیمو تر ساعتونو مزل وروسته خپل ناروغان د ولسوالۍ مرکزي کلینیک ته را وړي، خو دغه کلینیک کې د امکاناتو او متخصص پرسونل د نه شتون له امله، پر درملنې ډاډمن نه دي.
دوی له مسوولو ادارو غواړي چې د روغتیایي خدمتونو په برخه کې جدي پاملرنه وکړي او د ولسوالۍ پر کچه یو مجهز روغتون جوړ کړي.
د سیمې یو تن اوسېدونکي وايي: « دا کلینیکونه له موږ ډېر لرې دي، دوه ساعته مزل کوو ترڅو دلته را ورسېږو. موږ غوښتنه کوو چې موږ ته په خپله ساحه کې کلینیک جوړ کړي، ځکه موږ د واورو په وخت کې خپل ناروغان نه شو رسولی.»
د سیمې یو بل اوسېدونکی وايي: «موږ درې ساعته مخکې له کوره حرکت کړی او دلته راغلي یو. زموږ سیمه کې نه روغتون شته او نه هم ډاکټر؛ حتا د ټیلفون پایه نه شته چې د خپل عاجل ناروغ په اړه چاته خبر ورکړو.»
سره له دې چې د ځايې روغتیايي مرکزونو غړي امکاناتو او خپلې وړتیا ته په کتو د خدمتونو وړاندې کولو خبره کوي، خو وايي، د بېړنيو او بستر کېدو ته اړو ناروغانو لپاره خونې نه لري.
د البرز ولسوالۍ کلینیک ډاکټر فیض محمد وايي: « ترکومه ځایه چې موږ امکانات لرو، خپله همکاري کوو، لومړنۍ مرستې وړاندې کوو؛ خو کله چې دلته زموږ په وس نه وي پوره، اړوند روغتون ته یې راجع کوو. هغه ناروغان چې په شدیده او متوسطه خوارځواکۍ اخته وي، موږ د دوی لپاره امکانات لرو، همدارنګه د سراپا ناروغانو لپاره هم خدمات لرو، خو نور ناروغان روغتون ته راجع کوو.»
د البرز ولسوالۍ کلینیک ډاکټر سراج وايي: « اوس مهال د کارمندانو له پلوه کمبود نه لرو، خو امکانات کم دي. موږ باید په البرز کې روغتون ولرو کلینیک کفایت نه کوي. موږ دلته د بېړنیو او هغو ناروغانو د درملنې امکانات نه لرو چې روغتیايي حالت یې نازک وي.»
ځايي چارواکي هم ستونزه مني، خو ډاډ ورکوي چې له اړوند ادارو سره یې خبرې کړې او تمه ده چې د روغتیا برخې ستونزې را کمې شي.
د البرز ولسوال سیف الله معتصم وايي: « موږ دلته د ولسوالۍ په مرکز کې کلینیک لرو، خو د نورو کلینیکونو په څېر یې امکانات لږ دي. د ناروغانو د بستر لپاره ځای نه لري. دلته یوازې د عادي ناروغانو درملنه کېږي.»
د یادونې وړ ده چې البرز د بلخ هغه لرې پرته او غرنۍ ولسوالي ده چې له مرکز مزار شریف ښار ۸۵ کیلومټره لرې پرته ده.
