د عامې روغتيا وزارت مسوولين مني چې د هېواد پر کچه شاوخوا ۷۲ سلنه وګړي ثانوي روغتيايي خدماتو ته لاسرسی نه لري.
د دغه وزارت سرپرست کابل کې یوې خبري ناستې ته وویل، په تېرو څو لسیزو کې د ولسوالیو پر کچه روغتیايي خدمتونو ته په سمه توګه پاملرنه نه ده شوې او اوسني روغتیايي خدمتونه هم د خلکو اړتیاوې نه شي پوره کولی.
د مولوي نور جلال جلالي په خبره، د هېواد په لرو پرتو ولسواليو او کلیو کې مېشت خلک د ډېرو کوچنيو روغتیایي ستونزو لپاره هم ولایتي او مرکزي روغتیایي مرکزنو ته مراجعه کوي.
جلالي زیاتوي:« د ځينو دقیقو ارقامو پر اساس، د ولسوالیو ۷۲ سلنه اوسېدونکي ثانوي خدماتو ته لاسرسی نه لري او د ډېرو کوچنیو روغتیايي ستونزو لپاره هم مرکزي او ولایتي روغتیايي مرکزونو ته مراجعه کوي. په ولسوالیو کې د داسې روغتونونو نه شتوالی چې د ولسوالۍ ټولې اړتیاوې پوره کړي، د دې لامل شوې چې ډېر خلک په لوړو لګښتونو او له سختو لارو په تېرېدو سره د ولایتونو مرکز ته لاړ شي. دا په مستقیم او غیر مستقیم ډول د کورنیو په اقتصاد او په ټوله کې د هېواد په ملي اقتصاد بده اغېزه کوي.»
د عامي روغتیا وزارت سرپرست د خپلو خبرو په یوه برخه کې وایي، اوسمهال د هېواد څه باندې ۴۰۰ ولسوالیو له ډلې، یوازې ۹۳ ولسوالیو کې کوچني روغتيايي مرکزونه شته دي.
د نور جلال جلالي په وينا، د اسلامي امارت د رهبر له لورې د هېواد په ۳۱۸ ولسواليو کې د روغتيايي مرکزونو جوړولو لپاره ۷ ميليارده افغانۍ بوديجه منظوره شوې او ډېر ژر به پرې عملي کار پیل شي.
هغه په دې اړه وايي: « د افغانستان اسلامي امارت د عالي قدر امیرالمؤمنین له لوري د یوخاص لطف او مرحمت له وجهې بودیجه ورته منظوره شوې ده. قانوني او ابتدايي مراحل یې ترسره شوي او د روغتونونو د تعمیراتو چارې تدارکاتي پروسه یې عملاً پیل کېږي. له لسیزو را په دېخوا تر اوس مهال پورې په ټول هېواد کې نږدې ۱۳ زره بسترونه لرو. په داسې حال کې چې د نویو عمومي روغتونونو په جوړولو سره به نږدې لس زره نور بسترونه هم زیات شي. دا د هېواد په تاریخ کې د روغتیايي سیسټم د پراختیا اړوند ستر او مثبت بدلون او پرمختګ دی او په نتیجه کې به یې د ولسوالیو پر سطحه یو قوي روغتیايي سیسټم راتلونکي کې ولرو.»
په ورته وخت کې جلالي وايي، په دغو روغتونونو کې به په ټولیز ډول، ۲۷ زره مسلکي او اداري پرسونل ته د کار زمینه برابره شي چې د استخدام چارې به یې د یوه منظم پلان او شفاف مکانېزم له لارې تر سره شي.
دغه راز جلالي زیاتوي، اوسمهال په ټول هېواد کې د ناروغانو لپاره شاوخوا ۱۳ زره بسترونه شته چې د نویو روغتونونو په جوړېدو سره به نږدې ۱۰ زره نور بسترونه هم زیات شي.
جلالي په دې اړه وايي: « په یادو روغتونونو کې چې هر یو به یې نږدې ۸۵ تنه روغتیايي پرسونل ولري، ۲۷ زره روغتیايي کارکوونکو ته د کار زمینه برابره شي او د استخدام چارې به یې د یوه منظم پلان او شفاف مکانېزم په اساس ترسره کېږي، انشاالله.»
همدارنګه د عامي روغتیا وزارت مالي او اداري مرستیال ملا بخت الرحمن شرافت وايي: « هرکال انشاالله دغه صحي مراکز د پوهنتونونو په شمول باندې موږ ته کافي تخنیکي او مسلکي کادرونه راکوي چې هغه موږ په دغو شفاخانو او روغتونونو کې د یوې شفافې پروسې له لارې وګومارو.»
د عامي روغتیا وزارت سرپرست دا هم وویل، د هېواد روغتيايي سيسټم پیاوړي کولو په موخه يو لړ اصلاحات په پام کې نیول شوې چې په پلې کېدو سره به يې د ولسواليو پر کچه روغتيايي مرکزونو ته د خلکو لاسرسی زيات شي.
