د هېواد په ۱۱ ولایتونو کابل، کندهار، هلمند، اروزګان، زابل، ننګرهار، کونړ، لغمان، نورستان، هرات او کندوز ولایتونو کې د دوشنبې په ورځ (د ۱۴۰۳ کال د مرغومي ۳ مه ) د ګوزڼ یا پولیو د واکسین درې ورځنی کمپاین پيل شو.
د عامې روغتیا وزارت چارواکي وايي،، د دې کمپاین په لړ کې به شاوخوا ۴.۸ میلیونه تنه له پنځو کالو کم عمره ماشومان د ګوزڼ پر وړاندې واکسین شي، ترڅو له دې خطرناکې ناروغۍ وژغورل شي.
د عامې روغتیا وزارت ویاند شرافت زمان وايي: « د هېواد په ۱۱ ولایتونو کې د پولیو واکسین کمپاین پیل شو. یاد کمپاین چې درې ورځې به ادامه ولري، نږدې ۴.۸ میلیونه هغه ماشومانو ته چې له پنځو کالو کم عمر لري، واکسین تطبیق شي. له قومي مخورو، علمای کرامو او د سیمې له بانفوذه اشخاصو مو هیله دا ده چې په سیمه کې زموږ له واکسیناتورانو سره مرستندویه اوسي، ترڅو موږ وکولی شو د واکسین په ښه پلې کولو سره د پولیو ناروغۍ په افغانستان کې مخنیوی وکړ.»
افغانستان د پاکستان ترڅنګ د هغو محدودو هېوادونو له ډلې دی چې لاهم په کې د ماشومانو د ګوزڼ مثبتې پېښې شته دي.
د ماشومان د ګوزڼ نړيوال بنسټ د وروستي راپور له مخې، سږکال تر دې دمه په افغانستان کې د ماشومانو د ګوزڼ ۲۳ مثبتې پېښې ثبت شوې چې د تېر کال پرتله د پام وړ زياتوالی ښيي.
له دې سره، په ځينو لرې پرتو سيمو کې کله ناکله د ګوزڼ ضد واکسين په اړه د ځينو کسانو له لوري شکونه څرګند شوي، خو اوس ښکاري چې ډېری خلک د پوليو ضد واکسين پر ارزښت پوه شوي او ټينګار کوي چې د پوليو ضد کمپاينونه دې ټول هېواد ته وغځول شي.
د کابل ښار اوسېدونکی بلال وايي: « له دولت زموږ غوښتنه دا ده چې دغه کمپاین په ۳۴ ولایتونو کې فعاله کړي، ترڅو د هېواد په ګوټ کوټ کې ماشومان واکسین شي او دغه ناوړه ناروغي له منځه لاړه شي.»
د کابل ښار یو بل اوسېدونکی اظهارالله نیازی وايي: « که په دې چاره کې ملت همکار نه وي، دا ناورغي له منځه نه ځي. باید ملت همکاري وکړي ترڅو پېښې صفر ته ښکته شي. د ملت همکاري ډېره مهمه ده.»
ګوزڼ (پولیو) یوه خطرناکه ناروغي ده چې له امله یې د بدن غړي فلج کېږي. د ډاکټرانو په وينا، د ګوزڼ د مخنیوي يوازینۍ لاره ماشومانو ته په ټاکلي وخت واکسين ورکول دي.
ډاکټر کمین ساپی په دې اړه وايي: « پولیو یا ګوزڼ یوه خطرناکه او مرګونې ناروغي ده چې ابتدايي اعراض او علایم یې تبه، دردونه، خستګي او کسالت دي چې وروسته د اندامونو د شخۍ سبب ګرځي او په پای کې د دایمي فلج او مړینې باعث کېدای شي. له کورنیو هیله دا ده چې دوی باید د خپلو ماشومانو د واکسیناسیون په برخه کې ناغېړي ونه کړي او په دویم ګام کې د عامه پوهاوي په اړه باید ذهنیتونه پراخ شي او هغه زعیم او مسوولین چې مسوولیت لري، که دا ملا امام وي یا ولسوال او والي، باید دغه کمپاینونه پيل کړي.»
له دې وړاندې د اکټوبر په ۲۸ مه هم د عامې روغتیا وزارت له لوري د پولیو واکسین درې ورځنی کمپاین په ۱۶ ولایتونو کې ترسره شو او شاوخوا ۶.۲ میلیونه له پنځو کالو کم عمره ماشومانو ته په کې د ګوزڼ ضد څاڅکي ورکړل شوي وو.
