د روشن مخابراتي شرکت د کارکوونکو له لوري جوړ شوی پروفایل ګټې اخیستنې ته وسپارل شو.
په دې پروفایل کې چې د درېیو او شپږو میاشتو لپاره غږیزي کڅوړې، انټرنېت او د پيغامونو وړاندیزونه موجود دي، مسوولین یې موخه په کم لګښت هېوادوالو ته د غوره خدمتونو وړاندې کول بولي.
د روشن مخابراتي شبکې د بازارموندنې مسوول عبدالعزیز نیازی وايي: « نن ویاړو چې د الفا پرایم پلانونه معرفي کوو. هغه پلانونه چې د خپلو بې ساري ځانګړنو سره به زموږ پېرودونکي تل له یوبل سره په اړیکو کې وساتي. په دغو پلانونو کې چټک انټرنېټ، روشن ته نامحدودې اړیکې، نورو شبکو ته اړیکې او له ټولو مهم یې نامحدود وټسپ شامل دي. دغه وټسپ له هېڅ ډول محدود سرعت څخه ستاسو په واک کې درکول کېږي. دا هغه ځانګړتیا ده چې تر اوسه یې هېڅ بل یو مخابراتي شرکت نه لري.»
همدارنګه د روشن مخابراتي شبکې د بازارموندنې څانګې کارکوونکی احمد فهیم وايي: « له نورو کڅوړو سره د الفا پرایم توپير دا دی چې له نورو کڅوړو ډېر زیات ارزانه دی. که چېرې پرتلنه وکړو، دا مهال ټولې شبکې ۱۰.۵ جي بي په ۶۰۰ افغانیو ورکوي، خو موږ په الفا پرایم کڅوړو کې ۱۲ جي بي انټرنېټ، نا محدود وټسپ، نامحدودې اړیکې او نامحدود پیغامونه یوازې د ۶۵۰ افغانیو په بدل کې ورکوو.»
ورته مهال، د اترا ادارې مسوولین هېوادوالو ته د مخابراتي شبکو له لوري دا ډول اسانتیاوې رامنځته کول ستایي او په خبره یې، د یادې ادارې د هڅو په لړ کې د مخابراتي شبکو د غږیزو اړیکو، انټرنېټ او پیغامونو لګښتونه د پخوا پرتله تر ډېره را ټیټ شوي او دا پلان به د راتلونکي کال له لومړۍ میاشتې عملي شي.
د اترا ادارې تخنیکي مرستیال عطا محمد یاري وايي: « مخکې موږ سقف ۱.۸۵ افغانۍ ټاکلی و خو اوس دغه سقف ۱.۳ افغانیو ته راټیټ شوی. دا په حقیقت کې مخابراتي شرکتونه باید د شبکې په داخل کې د یوې دقیقې لپاره له ۱.۳ افغانیو زیاتې وا نه خلي. همدارنګه له یوې شبکې بلې شبکې ته د اړیکو پخوانی سقف ۲.۲ افغانۍ و چې اوس ۱.۴ افغانیو ته راټیټ شوی.»
په دې وړاندیزونو کې چې پخوا ۳.۲ جي بي انټرنېټ د ۳۰ ورځو لپاره په ۳۳۰ افغانیو پلورل کېده، له دې وروسته به په ۲۶۴ افغانیو پلورل کېږي او په همدې ترتیب به په هر وړاندیز کې د بیو د پام وړ کمښت رامنځته شي.
