د نیمروز ولایت په مرکز زرنج ښار کې ودان ولایتي روغتون ته هره ورځ سلګونه ناروغان مراجعه کوي.
د زرنج ښار اوسېدونکي شکايت کوي چې ولايتي روغتون کې د خدمتونو وړاندې کولو ظرفيت ټیټ دی او ناروغانو ته په کې سمه پاملرنه نه کېږي.
دوی له سرپرست حکومته غواړي چې دلته د نوي جوړېدونکي سل بستريز روغتون د جوړولو چارې چټکې او ژر یې بشپړې کړي.
د شېرخان په نوم د نیمروز اوسېدونکی وايي: « له دولت غوښتنه کوم چې د نیمروز سل بستریز روغتون په عاجله توګه جوړ کړي؛ ځکه چې په زرنج ښار کې اوسنی شته دولتي روغتون ډېرې ستونزې او نیمګړتیاوې لري. دغه روغتون د ښار په منځ کې دی او د موټرو د ګڼه ګوڼې له امله ناروغان په تکلیف وي.»
د نیمروز اوسېدونکی توریالی هم ورته غوښتنه لري او وايي: « د اوسني دولتي روغتون ځای کوچنی دی او هم ډېر بیروبار دی. له چارواکو غوښتنه کوم د سل بستریز روغتون کارونه چټک او ژر تر ژره پای ته ورسوي.»
د نيمروز سيمه ييز چارواکي وايي، په دې ولايت کې د سل بستريز روغتون د جوړېدو چارې ټولې بشپړې شوې او ډاډ ورکوي چې په نږدې راتلونکي کې به ګټه اخيستنې ته وسپارل شي.
د نیمروز والي قاسم خالد وايي: «الحمد الله د روغتون کار سل په سلو کې بشپړ شو. هغه کار چې موږ له پلان سره سم قراردادي شرکت ته سپارلی و، نن بشپړ شو. خو بیا هم په تأسف سره باید ووایم چې د اوبو د زېرمې ستونزه لري او اوبه یې په ټولو بلاکونو کې روانې وي.»
د روغتون جوړونې قراردادي شرکت رییس عبدالواسع وايي: « د روغتون جوړونې کارونه پای ته رسېدلي، یوازې پاک کاري یې پاتې ده چې راتلونکو څو ورځو کې به پای ته ورسېږي. موږ ته چې کوم مسوولیت راسپارل شوی و، شپه او ورځ مو هڅه وکړه چې په ټاکلي وخت یې پای ته ورسوو. هېوادوالو ته ډاډ ورکوم چې راتلونکو څو ورځو کې به روغتون پرانستل شي.»
په زرنج کې د سل بستریز روغتون جوړولو کار په ۱۳۹۷ لمریز کال د مخکېني حکومت پر مهال پیل او روان ۱۴۰۳ کال د سرپرست حکومت له خوا بشپړ شو.
