د نورستان ولایت نورګرام ولسوالۍ په کولتن کچه دره کې د ۲۸ میلیونه افغانيو په مالي لګښت یو روغتیايي مرکز جوړېږي.
ځايي چارواکي وايي، دغه روغتیايي مرکز د ملګرو ملتونو د کډوالو ادارې (یو.اېن.اېچ.سي.ار) په مالي لګښت د یو کال په موده کې جوړېږي چې د انګړ یا احاطې پر دېوال سربېره به ۸ خونې ولري او په ټولو اړوند طبي وسایلو او تجهیزاتو به سمبال وي.
د نورګرام ولسوال مولوي عبیدالله توپان په دې اړه وايي: « د دې کلینیک د بنسټ ډېره اېښودل موږ ته لوی اهمیت لري. یو اهمیت یې دا دی چې خلک ډېر لرې پراته دي او له ل۱۰ تر ۲۰ کیلومټرو لرې واټن مرکز ته ځي. له دې سره به د دوی ستونزې په همدې سیمه کې حل شي. دا روغتون د نورستان د خلکو لپاره د الله تعالی نعمت او د خلکو لپاره لویه بریا ده.»
د کولتن کچه درې اوسېدونکي د دې روغتیايي مرکز جوړېدو ته هیله من دي او وايي، له دې سره به یې روغتیايي ستونزې په نسبي توګه هوارې شي
د نورګرام اوسېدونکی محمد اقبال وايي: « په دې سره به نیږدې ۱ زر ۵۰۰ تنو ستونزې رفع شي. پخوانی کلینیک له دې ځایه ډېر لری دی او هغې ساحې ته د خلکو ورتګ ډېر ستونزمن و.»
نورستان یو له هغو ولایتونو دی چې د غرني طبیعت او لارو د نه شتون له امله په کې پراختیايي پروژې نه دي پلي شوې.
د دې ولایت خلک په ځانګړې توګه د روغتیايي خدماتو له کمښت شکایت لري او وايي، ډېر کله یې ناروغان جلال آباد ښار او لغمان ولایتونو ته په لارو ساه ورکوي.
