د اسلامي امارت د عامې روغتیا وزارت سرپرست چین ته د خپل رسمي سفر په لړ کې د سنتي طب نړیوال کنفرانس کې ګډونوالو ته د وینا پرمهال، په سیمه کې د سنتي طب په برخه کې د روغتیا نړیوال سازمان او شانګهای همکاریو سازمان ترمنځ ګډه همکاري اړینه بللې او ټینګار یې کړی چې په افغانستان کې باید د سنتي طب برخه معیاري او د عصري طبابت برخه وګرځي.
د عامې روغتیا وزارت ویاند شرافت زمان وايي: « په دې کنفرانس کې چې موخه یې د سنتي طب په برخه کې د تجربو او لاسته راوړنو شریکول و، د بېلابېلو هېوادونو وزیرانو، مرستیالانو، څېړونکو او د یو شمېر موسسو استازو هم په کې ګډون درلود. د عامې روغتیا وزیر ښاغلي نورجلال جلالي په سیمه کې د سنتي طب په برخه کې د روغتیا نړیوال سازمان او همدارنګه د شانګهای سازمان همکاري اړینه وبلله. ښاغلي وزیر د خپلې وینا په ترڅ کې وویل چې په افغانستان کې باید د سنتي طب برخه معیاري او د عصري طبابت برخه وګرځي. همدارنګه د دې برخې مینه والو ته معیاري تدریسي نصاب جوړ شي.»
د چین په کوربه توب د سنتي طب نړیوال کنفرانس چې موخه یې یاده برخه کې د تجربو او لاسته راوړنو شریکول دي، د بېلا بېلو هېوادونو د روغتیا وزیرانو، مرستیالانو، څېړونکو او د یو شمېر مؤسسو استازو ګډون کړی دی.
یاد کنفرانس ته د اسلامي امارت د عامې روغتیا سرپرست وزیر د سنتي طبابت برخه کې د چین او افغانستان تر منځ په دوه اړخیزه همکارۍ ټینګار کړی.
د عامې روغتیا وزارت ویاند په دې اړه وايي: « ښاغلي وزیر د سنتي طب په برخه کې د چین او افغانستان ترمنځ پر دوه اړخیزه همکارۍ ټینګار وکړ. موخه دا ده چې د ظرفیت جوړونې، تجربو شریکولو او په دې برخه کې د شریکو څېړنو زمینه باید برابره شي. د دې سفر پرمهال د عامې روغتیا ښاغلي وزیر د ځینو نورو روغتیايي مسوولینو سره هم لیدنې ترسر کړې دي او موخه یې دا ده چې موږ وکولی شو د افغانستان په روغتیايي سیسټم کې شته اړتیاوو باندې کار ترسره کړو.»
د عامې روغتیا وزارت ویاند دغه راز وايي، سرپرست وزیر سربېره پر دې چې د ظرفیت جوړونې د تجربو شریکول یې مهم بللي، د افغانستان عامې روغتیا وزارت د کارکوونکو د ظرفیت لوړونې او روغتیا برخه کې یې د همکاریو پر پراختیا هم خبرې کړې.
داکټر شرافت زمان وايي: « په دې لیدنه کې د ملاریا، نري رنځ، پولیو او نورو ورته ساري ناروغیو د کنټرول او مخنیوي اړوند خبرې ترسره شوې. د عامې روغتیا ښاغلي وزیر د دې لیدنې ترڅنګ، د چین د ساري ناروغیو کنټرول او مخنیوي مرکز یا سي.ډي.سي او همدارنګه د انفولانزا ملي مرکز څخه هم لیدنې ترسره کړې. موخه همدا ده چې موږ وکولی شو د نورو له تجربو څخه ګټه واخلو او د هغه څه په اړه له نورو سره نظرونه تبادله کړو چې د روغتیا په برخه کې اړین دي، ترڅو وکولی شو د هېواد هر وګړي ته معیاري روغتیايي خدمات برابر کړو.»
د روغتیا وزارت سرپرست نور جلال جلالي د سه شنبې پر ورځ (د ۱۴۰۳ کال د لیندۍ ۱۳) چین ته په سفر تللی او د سفر پر مهال یې د یاد هېواد روغتیايي چارواکو سره لیدنو کې د ملاریا، نري رنځ، ګوزڼ او نورو ساري ناروغیو د کنټرول او مخنیوي برخو کې د کابل او بېجینګ پر ګډې همکارۍ ټینګار کړی او د همکاریو ژمنې یې ترلاسه کړې دي.
