د عامې روغتیا وزارت وایي، ټاکل شوې د دې کمپاین په لړ کې د پنځو لوېدیځو ولايتونو له پنځو کالو کوچنیو ماشومانو ته د ګوزن ضد واکسين ورکړل شي.
د چارواکو په خبره، دغه کمپاین د شنبې په ورځ په کندهار، اروزګان، هلمند، نیمروز او هرات ولایتونو کې پيل شوی او څلور ورځې به ادامه ولري.
د دغه وزارت ویاند شرافت زمان وايي، د تازه پيل شوي کمپاين په لړ کې به شاوخوا ۲.۴ ميليونه تنه هغه ماشومان واکسين شي چې عمرونه يې له ۵ کلونو کم وي.
زمان زیاتوي: « د هېواد په پنځو ولایتونو کندهار، هلمند، اروزګان، نیمروز او هرات ولایتونو کې د پولیو د واکسین څلور ورځنی کمپاین پیل شو. د دې کمپاین په لړ کې به دوه ۲.۴ میلیونه تنو له پنځو کالو کوچنیو ماشومانو ته د ګوزڼ واکسین تطبیق شي او څلور ورځې به ادامه ولري. د افغانستان اسلامي امارت هڅه کوي چې د دغه واکسین په تطبیقولو سره د پولیو د خطرناکې ناروغۍ مخنیوی وکړي.»
همدارنګه د عامې روغتيا وزارت له ديني عالمانو، قومي مشرانو او کورنيوغوښتنه کوي چې د ماشومانو د غوره روغتيا او ښې راتلونکې لپاره دې له واکسيناتورانو سره همکاري وکړي.
له دې سره ډاکټران وايي، که کورنۍ غواړي ماشومان یې په دایمي توګه له فلج کېدو وژغورل شي، نو خپلو ماشومانو ته د ګوزڼ یا فلج ضد واکسين څاڅکي ورکړي.
ډاکټر کمين ساپی د پولیو واکسین له دغې خطرناکې ناروغۍ د ژغورل کېدو او له فلج تشې ټولنې تضمین بولي.
هغه زیاتوي:« هغه کورنۍ چې خپلو ماشومانو ته په ټاکلي وخت د پولیو واکسین نه ورکوي، زموږ غوښتنه او سپارښتنه دا ده چې د پولیو واکسین په خپل وخت سره ماشومانو ته ورکړي ترڅو یې ماشومان د فلج له ناورغۍ خوندي شي او ټولنې ته روغ اولادونه وړاندې کړي.»
افغانستان او پاکستان په نړۍ کې یوازیني دوه هېوادونه دي چې د پولیو ویروس په کې په بشپړه توګه له منځه نه دی تللی.
له دې مخکې د روغتیا نړیوال سازمان د جون په ۳۰مه راپور ورکړ چې د ۲۰۲۴ کال په اوږدو کې یې په افغانستان کې د ګوزڼ شپږ مثبتې پېښې ثبت کړې دي.
