د عامې روغتیا وزارت د ګوزڼ پر وړاندې د ماشومانو د خوندیتوب لپاره د نړیوالو ادارو په همغږۍ د دوشنې په ورځ د پولیو ضد واکسین لومړی ملي کمپاین پيل کړ.
دغه وزارت وايي، د یاد ملي کمپاین په لړ کې به شاوخوا ۱۰.۷۲ میلیونه له پنځو کلونو کم عمره ماشومان واکسین شي او د تېرو څو ورځو سختو ورښتونو او سړې هوا له امله له غور، داکنډي او بامیان پرته به دغه کمپاين په ټولو ولایتونو کې پلی شي.
د عامې روغتیا وزارت سرپرست ډاکټر قلندر عباد د ګوزڼ ضد ياد کمپاین له پیلېدو سره له خلکو غوښتي، چې د ماشومانو دايمي روغتيا لپاره د دغه کمپاين له تطبيق سره همکاري وکړي.
عباد زیاته کړې:« موږ له نړیوالو ادارو سره په ګډه ژمن یوو، چې ټول هېواد کې د پولیو ناروغي له منځه یوسو. د پولیو ناروغۍ ختمولو لپاره د والدينو، دیني عالمانو او قومي مخورو په ګډون د ټولو افغانانو ملاتړ اړین دی. موږ له ټولو غوښتنه کوو، چې له دې ناروغۍ سره په مبارزه کې خپل مسوولیت ترسره کړي او د خپلو ماشومانو روغتیا او خوندیتوب ته پاملرنه وکړي.»
د عامې روغتیا وزارت داسې مهال دغه کمپاین پیل کړی، چې هممهاله له پولیو د پاک افغانستان بنسټ هم د پولیو پر واندې پر ګدې همکارۍ ټینګار کړی.
دغه بنسټ زیاته کړې:« په افغانستان او پاکستان کې هغه عوامل، چې د پولیو په خپرېدو کې اغېزه لري؛ عبارت له ضعیف روغتیایي خدمتونو، د عامه پوهاوي نشتوالی، د سواد کچې ټیټوالی، د نفوس زیاتوالی، د نس ناستې ناروغۍ زياتې پېښې او د ګوزڼ ضد واکسین کم پوښښ دی.»
دغه بنسټ همدار راز ویلي، د ګوزڼ پر ضد تازه پیل شوي کمپاین کې به د واکسین ترڅنګ ماشومانو ته د دوی د بدن مقاومت زياتوالي په موخه ويټامین (اې) هم ورکړل شي.
اخوا د پولیو لمنځه وړلو ملي بېړني عملیاتي مرکز مسوول ډاکټر عبدالقدوس بریالی وايي د سږ پسرلی پولیو ضد کمپاین د شاوخوا ۳۵زره ۳۵۵ کاري ټیمونو او ۸۵ زره ۶۲۱ رضاکارانه پرسونل په شتون په بریالیتوب سره پیل شو.
دا په داسې حال کې ده، چې په ټوله نړۍ کې د پولیو ناروغي مهار شوې.
د عامې روغتیا وزارت د مالوتو له مخې، ، تېر کال په ټول هېواد کې د ګوزڼ ۶ مثبتې پېښې ثبت شوې وې او سږ کال هېڅ پېښه نه ده ثبت شوې.
