د افغانستان ختیځ زون ننګرهار، کونړ، لغمان او نورستان ولایتونه چې تېرو جګړو په کې ډېرې برخې زیانمنې کړي، خو روغتیا برخه کې بیا پرمختګونه شته دي.
د ننګرهار حوزوي روغتون مسوولین وایې، په وروستیو کې د عامې روغتیا وزارت او نړیوالو سازمانونو په همکارۍ او مالي مرسته د روغتیا په برخه کې ګڼې اسانتیاوې رامنځته شوي.
د ننګرهار حوزوي روغتون رئیس ډاکټر عطاء الله شینواری وايي:« زموږ له ګاونډیو ولایتونو یوازې د ننګرهار عامې روغتیا د جراحي څانګې ته ناروغان مراجعه نه کوي بلکې د افغانستان له کوټ کوټ څخه ناروغان راځي. له هر ولایته ناروغان راځي، له تخار ولایت راځي، له کندوز ولایت راځي، له کابل ولایت راځي، له لوګر ولایت راځي، له کاپيسا ولایت راځي، له بېلابېلو ولایتونو دلته ناروغان راځي او دلته ورته خدمات ترسره کېږي. په ۲۴ ساعتونو کې دلته له ۴۰ تر ۶۰ ناروغان عملیات کېږي.»
د ننګرهار حوزوي روغتون سرطبیب ډاکټر نورالله احمدزی وايي:« له نړیوالو موسسو مو غوښتنه دا ده چې د روغتون په پراخوالي کې، د بسترونو په زیاتوالي کې، د پرسونل په زیاتوالي کې، همدارنګه د درملو په زیاتوالي کې او د طبي وسایلو په زیاتوالي کې اړینه همکاري وکړي.»
د ننګرهار او کونړ ولایتونو د عامې روغتیا ریاست مسوولین وايي، اوس مهال یوازې په دغو دوو ولایتونو کې د ۳۰۰ په شاوخوا کې روغتیايي مرکزونه او د میلیونونه افغانیو په ارزښت طبي وسایل لري؛ خو بیا هم هڅه کوي خدمات لا ښه او معیاري کړي.
د ننګرهار حوزوي روغتون ته چې له ځېنو نورو ولایتونو هم ناروغان د درملنې لپاره ور وړل کیږي، ډاګټران د مراجعینو شمېر ته په کتو وايي، شته امکانات بسنه نه کوي.
دوی ټینګار کوي چې روغتیا نړیوال سازمان او نور بنسټونه دې د درملو، طبي وسایلو او اړونده نورو روغتیایي برخو کې خپلې مرستې لام ډېرې کړي.
ډاکټر یما دولتزی وايي:« په آی.سي.او څانګه کې شاوخوا ۱۰ بستره دي چې هر ډول خدمات په کې وړاندې کېږي. موږ ته هغه ناروغان راځي، کوم چې د روغتون په نورو برخو کې د درملنې وړ نه وي.»
ولایتي روغتونونو کې بسترناروغان او پایوازان یې له روغتیايي خدمتونو رضایت ښيي او له ناروغانو سره د درملو ډېرولو غوښتنه کوي.
یو تن ناروغ وايي:« عملیات مې همدلته ترسره شو. پنځه یا شپږ ورځې کېږي، چې دلته راغلی یم. انشاء الله اوس مې ټپونه هم ښه دي او درد نه لري. خدمات ډېر ښه دي.»
د مالوماتو له مخې، دا مهال د لغمان او نورستان ولایت له روغتیايي مرکزونو سربېره د ختیځ زون په کونړ ولایت کې ۱۰۲ او په ننګرهار کې بیا ۲۷۵ روغتیايي مرکزونه فعال دي او هره ورځ په سلګونه ناروغان ورته مراجعه کوي.
په ټوله کې غوښتنه دا ده چې له افغانستان سره دې نړیوال بنسټونه د روغتیايي مرکزونو، درملو او د روغتیايي پرسونل په ظرفیت لوړونه کې خپلې همکارۍ او مرستې دوامداره او لا ډېرې کړي.
