په داسې حال کې چې له پاکستانه د افغان کډوالو راستنېدو بهير له دوه نيمو مياشتو راهيسې دوام لري، خو وخت ناوخت دغه راستنېدونکي د سپين بولدک او تورخم په پنډغالو کې د روغتيايي خدمتونو له کموالي شکايت کوي.
خو د روغتيا نړيوال سازمان له لوري په خپور شوي راپور کې ویل شوي چې يوازې له سپټبر تر نومبر میاشتې پورې په يادو پنډغالو کې یې زرګونه راستنو شویو کسانو ته روغتيايي خدمتونه وړاندې کړي دي.
په راپور کې ویل شوي، له خپلو شريکانو سره يې په کډه له پاکستانه په زور را اېستل شویو شاوخوا ۱۶۸ زرو افغان کډوالو سره روغتیایي مرستي کړي دي.
د راپور یوه برخه:« راستېدونکو کسانو لومړني روغتیایي خدمتونه، روغتیایی مشورې، روانې روغتیا، رواني ملاتړ او همدار راز د ماشومانو او مېندو اړوند ځانګړي خدمتونه تر لاسه کړي دي.»
په راپور کې ویل شوي چې پاکستان د ساړه او سخت ژمې په درشل کې افغانان پر زور خپل هېواد ته ستنوي او له همدې کبله د راستنېدونکو کسانو ترمنځ بېلابېلې ناروغۍ زياتې شوي دي.
د راپور یوه برخه:« د نومبر له لومړۍ نېټې څخه د ډیسمبر ۱۹ پورې۱۶۷ زره ۷۹۷ کډوالو ته خواړه، درمل او نور روغتيايي خدمتونو په برخه کې مرستې رسول شوي.»
بل لور ته له پاکستانه تازه راستانې شوې کورنۍ وايي، په پنډغالو کې د دولتي ادارو او نړیوالو روغتیايي سازمانونو له روغتیایې خدمتونو خوښ دي.
دوی د خپل ژوند او کورنۍ د خوندیتوب لپاره په روغتیایي او ورته نورو برخو کې د دې بنسټونو پر دوام داره ملاتړ ټینګار کوي.
له پاکستانه یو تن راستون شوی افغان کډوال وايي: « موږ ډېر ترې خوښ یو، هغه که سره میاشت ده او که صحت عامه؛ ټول شپه او ورځ زموږ خدمت ته ولاړ دي، درمل شته، هېڅ ستونزه نه لرو او ښه په منظم ډول زموږ خدمت ترسره کېږي.»
په ورته وخت کې یو شمېر ډاکټران د راستونو شویو کسانو روغتیا ته په اشاري وایي، له پاکستانه جبري ایستل شوي ټول افغانانو درملنه باید پر وخت ترسره شي څو د ساري ناروغیو د خپریدو لامل نه شي.
ډاکټر عبدالرازق احمدزی وايي: « په روغتیايي برخه کې د دوی مرستې د ستاینې وړ دي، ځکه که د نوي راستنېدونکو کډوالو ته د واکسین په برخه کې یا ساري او رواني ناروغیو برخه کې دوی سره مرسته ونه شي نورو ته هم ګواښ کېدلی شي، له دوی سره له زور زیاتي کار اخېستل شوی، ځورول شوي، نو دلته ورته په منظم ډول روغتیايي خدمات وړاندې کېږي.»
دا په داسې حال کې ده چې له سيپټمبر میاشتې راهیسې د تورخم او سپین بولدک له لارې ۷۷۶۰۰ افغانان له پاکستان څخه بېرته هېواد ته راستانه شوي دي.
