په خوست کې د ژمي له پیل سره هم مهاله د روغتیا برخې مسوولین په دغه ولایت کې د موسمي ناروغیو د ډېریدو خبر ورکوي.
د دغه ولایت ملکي روغتون د داخله ناروغيو ډاکټران وایي، هره ورځ نږدې سلو تنو پورې په موسمي ناروغيو اخته ناروغان د درمنلي په موخه ورځي.
د روغتياپالانو په وينا، که د موسمي ناروغۍ د مخنيوي پر وړاندې وقايوي تدابیر ونه نيول شي نو انديښنه شته چې يادې ناروغۍ به لا پراختيا پیدا کړي.
د خوست ملکي روغتون د داخله ناروغیو متخصص ډاکټر فیض احمد وايي: « هره ورځ نږدې ۷۰، ۸۰ ، ۹۰ او یوه نیمه ورځ تر ۱۰۰ هغه ناروغان وي چې موسم پورې تړلې دي، مراجعین ډېر زیات دي او هره ورځ نږدې له ۱۰ تر ۱۵ ناروغان بسترېږي.»
ورته مهال د یاد روغتون مسوولین ډاډ ښي چې د موسمي ناروغانو د درمنلي لپاره پوره چمتوالي لري.
د دوی په وينا که څه هم د دغه ولایت ملکي روغتون په عاجلو حالاتو کې د بسترونو له کموالی سر مخ دی خو بیا يې هم هڅه کړې چې اړین درمل او نور خدمات پر وخت تر ناروغانو ورسوي.
د خوست ملکي روغتون سرطبیب عزیزالرحمن مسلم وايي: « په داخله برخه کې خدمات وړاندې کوو، په دې برخه کې موږ هېڅ ډول ستونزه نه لرو. کوم ناروغان چې بستر ته اړتیا لري هغوی بسترېږي او کوم چې عادي درملنې ته اړتیا لري د هغوی درملنه په منظمه توګه ترسره او رخصت کېږي.»
اخوا د خوست عامې روغتیا ریاست مسوولین هم دغه ولایت کې پر موسمي ناروغیو د اخته کسانو د شمېر زیاتوالی تائیدوي.
د دوی په خبره د موسمي ویروسي ناروغیو د مخنیوي لپاره یې خلکو ته د عامه پوهاوي ترڅنګ په روغتیايي مرکزونو کې د ناروغانو د درملنې لپاره اړین درمل هم ځای پر ځای کړي دي.
د خوست عامې روغتیا مشر ډاکټر ګل صاحب شاه شاهین وايي: « موږ دوی ته عامه پوهاوی ورکوو چې ځانونه ګرم وساتي، د ځان محافظت وکړي، بله دا چې کلېنیکونه شته، درمل اضافه شوي او لا یې اضافه کوو.»
موسمي ناروغۍ چې هر کال د هوا د بدلیدو سره هم مهاله ترې خلک رنځ وړي د روغتیاپالانو په باور په دې برخه کې د سړې، ګرمې او یا خرابې هوا سره د خلکو نه پاملرنه یوه له هغو ستونزه ده چې خلک په دا دول ناروغيو اخته کوي.
اندېښنه شته چې په خوست کې د موسمي ناروغیو دا شمیرې ښایي لا ډېرې وي ځکه په دې تړاو ډېری خلک په شخصي روغتیایي مرکزونو او یا کورونو کې د تداوۍ هڅې کوي.
