له پاکستانه د افغان کډوالو له راتګ سره سم، که څه هم سرپرست حکومت د راستانه شویو کډوالو وضعیت ته د رسېدو په برخه کې د هر رازچمتووالي خبر ورکوي، خو د روغتیا نړیوال سازمان وايي، په ګڼو روغتیايي مواردو کې له ستونزه سره مخ دي.
یاد سازمان زیاته کړې:« له پاکستانه د راستنېدونکو افغان کډوالو په شمېر کې ورځ تر بلې زیاتوالي صحي خدمتونو ته اړتیا زیاته کړې. په داسې حال کې چې له دې وړاندې هم د درملو، د ښځینه صحي کارکوونکو، روغتیايي توکو او نورو تجهیزاتو په برخو کې جدي نیمګرتیاوې احساسېږي.»
د روغتیا نړیوال سازمان په روغتیا خدماتو کې د جدي تشې خبر ورکولو ترڅنګ، د یادو کډوالو روغتیايي وضعیت ته د رسېدو په موخه د ۱۰ میلیونه ډالرو د اړتیا خبر ورکوي.
یاد سازمان زیاته کړې:« د راستنېدونکو په زیاتېدونکي شمېر سره، روغتیایي سرچینې پراخېږي او په روغتیایي عملیاتو کې تمویل جدي تشه شتون لري. د روغتیا نړیوال سازمان د راستنو شویو افغان کډوالو روغتیايي وضعیت ته د رسېدو په موخه ۱۰ میلیونه ډالرو ته اړتیا لري.»
د سیاسي چارو شنونکي هم د یاد افغان کډوالو وضعیت ته د رسېدو په موخه د کډوالۍ چارو کې د ملګرو ملتونو د سترې کمېشنرۍ او نورو نړیوالو مرستندویه اداره څخه د مرستو غوښتنه کوي.
د سیاسي چارو شنونکی نازکمیر زیارمل وايي: « په دې کې د نړیوالو مرستندویه ادارې په ځانګړې توګه د کډوالو په چارو کې د ملګرو ملتونو سترې کمېشنرۍ همکارۍ ته ډېره اړتیا لیدل کېږي، چې د افغانستان له اوسني حکومت سره اوږه په اوږه ودرېږي او ملت هم د دوی ترڅنګ ودرېږي تر څو دغه خلک تر دې زیات نور له ناورین سره مخ نه شي.»
د نومبر له لومړۍ نېټې وروسته نږدې ۴۰۰ زره افغان کډوالو هېواد ته راستانه شوي چې ډېری هغه یې لا هم د کډوالو په پنډغالو کې تر شنه اسمان لاندې شپې ورځې تېروي.
د ملګرو ملتونو د اړونده ادارو په ګډون د ژغورنې نړیوالې ادارې او ګڼو نورو سازمانونو د دې کډوالو د وضعیت په تړاو اندېښنې څرګندې کړي.
