ټاکل شوې د کرېکټ ملي لوبډله د هند له لوبډلې سره د جون په ۶مه لوبې پيل کړي. په دې لوبو کې يوه ټېسټ او درې یو ورځنيو لوبو لوبلړۍ شاملې دي.
تازه د دې لوبو لپاره هند د شبمن ګېل په لوبډلمشرۍ لوبډله اعلان کړه، خو نامتو لوبغاړی جسپريټ بومرا ترې ايستل شوی او پر ځای يې د چټکې توپ اچونې لپاره محمد سراج او پراسید کرېشنا لوبډله کې شامل شوي.
مبصرين بیا له هند سره راتلونکې يو ورځنۍ او ټېسټ لوبې خورا مهمې بولي او له همدې امله ډاډه دي چې افغان لوبدله به د يوې پياړې لوبډلې په توګه په دې لوبو کې ځان ثابت کړي.
د کرېکټ مبصر ابوبکر صدیق وايي: « افغان لوبډله دا ځل په هند کې د دې هېواد له ملي لوبډلې سره یوه ټېسټ او درې یو ورځنۍ لوبې ترسره کوي، لپاره یې هندوستان د دواړو فارمټونو لپاره خپلې لوبډلې اعلان کړې. افغان لوبډله له څه مودې راهیسې په کابل او ولایتونو کې په تمریناتو بوخته ده او پوره چمتوالي لري. تمه ده چې افغان لوبډله به په دې لوبو کې ښه کارکردګي ولري.»
همدارنګه ځینې نور شنونکي د چټکو توپ اچوونکو ترڅنګ، د افغان سپېنرانو وړتياوو هيلهمن کړي او له همدې امله ډاډ ښيي چې ملي لوبډله به د هند له لوبډلې سره په لوبو کې ښه وځلېږي.
د کرېکټ مبصر صدام شینواری وايي: « افغان لوبډله راتلونکي جون میاشت کې له هند سره لوبې لري. موږ هیله لرو چې افغان لوبډله به بریا ترلاسه کړي. دا مهال زموږ ټول ملي اتلان په ننګرهار کې په لېسټ اې سیالیو کې بوخت دي او حالت ته په کتو، تمه ده چې بریاوې ترلاسه کړي.»
له هندي لوبډلې سره د سياليو لپاره تر اوسه افغان لوبډله نه ده اعلان شوې، خو کرېکټ بورډ وايي د هندوستان لوبډلې سره يې د سياليو لپاره د چمتوالي په موخه پر تمريناتي کمپ سربېره، په ننګرهار کې د لېسټ اې لوبې پيل کړي.
له دې وړاندې افغان لوبډلې له هندي لوبډلې څخه په ټېسټ، یو ورځنیو او شل اوریزو فارمټونو کې کوم لوبه نه ده ګټلې.
