د طبیعت په یوه پراخه او ښایسته غېږ کې د کرېکټ دا بېسارې ننداره ښيي چې دا لوبه د هېواد د نورو سیمو په څېر دلته هم ځانګړی محبوبیت لري.
د پکتیا په ځاځي ولسوالۍ کې د اریوب پریمیر لیګ وروستۍ لوبه چې د زرګونه مینهوالو په ګډون ترسره شوه.
ځایي اوسېدونکي وایي، د دا ډول سیالیو دوام نه یوازې د سیمې په پېژندنه کې مرسته کوي بلکې د ورزش ودې او د ځوانانو د هڅونې لپاره هم مهم ګام دی.
د سیالیو جوړونکی مسته خان ځاځی وايي: « دا لوبې د خوانانو د یوالي په موخه جوړې شوې، همدارنګه هدف لرو چې د اریوب ښکلا تر نړۍ پورې وځلوو.»
د سیمې اوسېدونکی محمد رفیق وايي: « موږ غواړو دلته راتلونکي کسان له ځان سره مثبت فکر او احساس ولېږدوي.»
د سیمې بل اوسېدونکی جاني جو اټک وايي: « دلته له ګڼو ځایونو خلک راځي او یو بل سره پېژني. موږ غواړو د خلکو اتحاد پياوړی کړو.»
لوبغاړي وایي، د خلکو دا ډول پراخ ملاتړ دوی ته لا ډېره انګېزه ورکوي، ترڅو خپلو استعدادونو ته وده ورکړي او له لرې پرتو سیمو راټوکېدلي لوبغاړي هم د پرمختګ فرصتونه ومومي.
دوی دغه راز د معیاري لوبغالو او اړینو امکاناتو نه شتوالی له مهمو ستونزو بولي او له مسوولو ادارو غواړي چې دې برخې ته یې پاملرنه وکړي.
لوبغاړي افضل وايي: « زموږ ځوانان ډېره ښایسته او مسلکي لوبه کوي. که چېرې دوی ته امکانات برابر شي، کولی شي راتلونکي کې د افغانستان استازیتوب وکړي.»
لوبغاړی اېمل شپون وايي: « دا لوبې زموږ د محلي لوبغاړو لپاره ډېرې ګټورې دي، ځکه دلته له مختلفو ځایونو او کلبونو لوبغاړي راځي او له یوبل زده کړه کوي.»
اخوا ځایي مسوولان بیا ډاډ ورکوي چې دا مهال په پکتیا کې د کرېکټ لوبه د چټکې پراختیا په حال کې ده او دوی هڅه کوي چې د خصوصي پانګوالو او خپلو امکاناتو په مرسته د لوبغاړو لپاره لازمې اسانتیاوې برابرې کړي.
د پکتیا کرېکټ آمر میرویس امان وايي: « موږ ډېر ځله هڅه کړې چې ولسوالیو ته سفر وکړو او هلته د لوبغاړو او محلي کلبونو ستونزې حل کړو.»
پانګوال حبیب الله ځاځی وايي: « موږ په پام کې لرو چې د دوی لپاره یوه مسلکي اکاډمي جوړه کړو، همدارنګه د کرېکټ په دې میدان به تر یو میلیون افغانیو پورې مصرف وکړو، ترڅو نیمګړتیاوې یې رفع شي.»
د اریوب پریمیرلیګ سیالیو اووم پړاو چې د افغانستان ملي لوبډلې د ځینو پخوانیو لوبغاړو ترڅنګ په کې د کورني کرېکټ ځیني پیاوړي لوبغاړي هم ولوبېدل، اتو لوبډلو په کې برخه اخیستې وه چې نږدې یوه میاشت یې دوام وکړ او په وروستۍ لوبه کې یې د ګل غونډۍ کلب، علي خېل کلب ته په ماتې ورکولو سره د دې سیالیو د سږني پړاو اتلولي ترلاسه کړه.
