په کندهار کې د سنو فارما درملو جوړولو کارخونه پرانېستل شوه

په کندهار ولایت  کې وړمه ورځ  د سنو فارما په نوم د درملو جوړولو یوې کارخونې په فعالیت پیل وکړ.

دغه کارخونه د ۷۱ پانګه والو له لوري د شپږو کلونو په موده کې جوړه شوې،چې په درېیو برخو کې به شااوخوا ۵۰ میلیونه ډالر پانګه پرې مصرف شي.

د یادې کارخونې مسوولین وايي، دا مهال د کارخونې یو فاز فعال شوی دی،چې د اته کاري ساعتونو په موده کې د ۵ میلیونه او ۶۰۰  زرو ګولیو، دوه میلیونه کپسول او ۶۰ زره بوتله شربت جوړلو ظرفیت لري.

د کارخونې مشر محمد سعید صدیق وايي، کارخونه د روغتیا نړیوال سازمان او د جي.اېم.پي په نړیوال سټنډرډ برابره ده.

صدیق زیاتوي:« دغه درې ماشینونه نن فعاله دي. درمل جوړ شوي دي، پایله یې مثبته ده او درمل اوس زموږ په ګودامونو کې ځای پر ځای دي. هېله شته ده،چې په راتلوونکو درېیو میاشتو کې سنوفارما دوه لینه نور فعاله کړي.»

د کارخونې د پرانېستې مراسمو کې د خوړو او درملو ملي ادارې مسولینو وویل ،هر کال په هېواد کې له یو میلیارد ډالرو ډېر پر درملو مصرفېږي، همدارنګه د باکیفیته درملو نشتوالی د دې لامل کیږي، چې زرګونه ناروغان د درملنې لپاره بهر ته ولاړ شي او ډېر لګښتونه وکړي.

 د درملو ملي ادارې مشر عبدالباري عمر وايي:«هر کال افغانان له افغانستانه ۳۰۰ میلیونه ډالر د خپلو ناروغانو درملنې لپاره له هېواده وباسي. زموږ افغانان ۷۷ سلنه صحي مصارف له خپل جیب کوي. که چېرې دلته کیفیت ښه وي، زموږ غذايي توکي، زموږ درمل له معیار سره برابر وي، نو بیا زما او ستا ولس د نورو هېوادونو په سرحدونو کې سرګردانه نه وي.»

د صنعت او سوداګرۍ سرپرست وزیر نورالدین عزیزي بیا وايي:« موږ تل هڅه کړې او کوو یې، چې د خپل صنعت ملاتړ وکړو»

په همدې حال کې سوداګر او صنعتکاران له حکومته د صنعت او سوداګرۍ په برخه کې د لا زيات ملاتړ غوښتنه کوي.

د مالوماتو له مخې، اوس مهال په هېواد کې د درملو له ۸۶ کارخونو څخه ۶۰ یې فعالې دي.

په دې وروستیو کې د روغتیا نړیوال سازمان له خوا په خپاره شوي راپور کې ویل شوي، چې د افغانستان خلک د خپل عاید ۷۰ سلنه په درملو لګوي.