د ننګرهار کرنې، اوبو لګولو او مالدارۍ ریاست مسوولینو د معلوماتو له مخې، سږ کال د دې ولایت په نهو ولسوالیو کې پر ۱۹ زره، ۲۲۰ جرېبه ځمکو ګني کرل شوي چې د اټکل له مخې به ترې ۱۸۱ زره او ۴۰۰ مټریک ټنه حاصل ترلاسه شي.
د ننګرهٔار کرنې ریاست ویاند، اجمل سبحاني وايي: « سږ کال په ۱۹ زره ۲۲۰ جرېبه ځمکو ګني کرل شوي چې د اټکل له مخې به ۱۸۱ زره ۴۰۰ مټریک ټنه حاصل ترلاسه شي. تېر کال په ۱۷ ولسوالیو کې په ۱۵ زره ۹۸۰ جرېبه ځمکو ګني کرل شوي وو چې ۱۵۰ زره ۷۷۸ مټریک ټنه حاصل ترې لاسه شوی و. همدارنګه، په هغو ولسوالیو کې ۹ زره ۸۰۰ تنو بزګرانو ته روزنه هم ورکړل شوې چې په کې ګني کرل کېږي.»
د مسوولینو په وینا، ګني د بهسودو، کامې، کوز کونړ، سره رود، ګوشتې، بټي کوټ، لعلپورې، غنيخېلو او مومندرې ولسوالیو کې کرل شوي دي. دوی زیاتوي، دا مهال په ننګرهار کې د ګوړې د تولید ۲۴۴ ګاڼۍ فعالې دي چې سلګونو کسانو ته یې د کار زمینه برابره کړې ده.
اجمل سبحاني وايي: « دلته ننګرهار کې ۲۴۴ ګاڼۍ د ګوړې په جوړولو بوختې دي او زرګونه کسانو ته په کې د کار زمینه برابره شوې. زموږ اټکل دا دی چې سږ کال به ۱۱ زره ۷۵۰ مټریک ټنه ګوړه تولید کړو.»
د ګاڼیو مالکان او بزګران هم سږني حاصلات د تېر کال په پرتله زیات بولي، خو وایي د ګوړې د تولید له زیاتوالي سره د بازار موندنې ستونزه هم ورسره زیاته شوې ده.
دوی له مسوولینو غواړي چې د ګوړې لپاره کورني او بهرني بازارونه پیدا او صادراتو ته زمینه برابره کړي.
بزګر صدام وايي: « د هر کال په تېرېدو سره د ګنیو ګښت هم زیاتېږي او ورسره ګاڼۍ هم زیاتېږي. ستونزه دا ده چې ګوړه مارکېټ نه لري. موږ غوښتنه کوو چې په کور دننه ولایتونه کې او دغه راز بهر کې د ګوړې لپاره بازار موندنه وشي.»
د ګاڼۍ مالک، اسد الله وايي: « اوس یوه بوجۍ ګوړه تر ۲۴۰۰ افغانیو خرڅېږي. له حکومت غوښتنه کوو چې نورو هېوادونو ته یې صادره کړي.»
پخوا به د هېواد د ګوړې ډېره اړتیا له پاکستان څخه پوره کېده، خو اوس د کورنیو تولیداتو له زیاتوالي سره د ګوړې نږدې ټوله اړتیا په هېواد دننه پوره کېږي.
د ګنیو د تولید زیاتوالی یوازې د کرنیزو حاصلاتو د ډېرېدو په مانا نه دی بلکې د ګوړې د تولید، کارموندنې او د بزګرانو د عوایدو د لوړولو لپاره هم مهم فرصت بلل کېږي.
ټینګار دا دی چې د دې تولیداتو د لا ودې لپاره د بازار موندنې، صادراتو او د بزګرانو د ملاتړ اړتیا ده.