د صنعت او سوداګرۍ وزارت مسوولین وایي، دا هوکړه لیکونه د افغانستان او قاره قلپاقستان سوداګرو ترمنځ د کرنې، صنعت، انرژۍ او کانونو برخو کې د ۱۱۲ میلیونه ډالرو په ارزښت لاسلیک شول. مسوولینو په دې اړه جوړو شویو مراسمو کې یو ځل بیا له افغان او بهرنیو سوداګرو وغوښتل چې د هېواد داخل کې پانګونه وکړي.
د صنعت او سوداګرۍ وزارت مرستیال شهاب الدین ثاقب وايي: « افغانستان مهمې ټرانزیټي لارې، بشري سرچینې، ځوان نسل او مخ پر ودې بازار لري او د دواړو خواوو ګډې پانګونې او سوداګرۍ ته ښه زمینه برابره کړې. موږ په بېلابېلو برخو کې له ګډو پانګونو هرکلی کوو.»
بله خوا، د قاره قلپاقستان خپلواک جمهوریت د خصوصي سکټور مسوولینو بلخ کې پانګونې ته بشپړه لېوالتیا ښودلې او ژمنه یې کړې چې د امکاناتو برابرولو او د همکاریو په صورت کې به له افغان سوداګرو، صنعتکارانو او بزګرانو سره دوه اړخیزې تخنیکي او مسلکي همکاري وکړي.
دوی هیله څرګنده کړې چې افغان حکومت ورته د قانوني پړاوونو له مخې ځمکې ورکړي چې معیاري سړې خونې، د لبنیاتو او د ښیښې تولیدي کارخونې او د پنبې پروسېس شرکتونه په کې جوړ کړي.
