تحریک طالبان،چې د پاکستان د حکومت پرخلاف جنګیږي،د لومړي وزیر شهباز شریف وروستۍ څرګندونې یې رد کړي دي.
د پاکستان تحریک طالبان (ټي.ټي.پي) په یوه خبرپاڼه کې لیکلي، پاکستان د خپلو ګاونډیانو او سیمې د بې ثباتۍ لپاره وسله والې ډلې روزي.
د خبرپاڼې یوه برخه:« موږ په خپله سیمه کې مستقر یو او اړتیا نه لرو،چې له بل ځایه فعالیت وکړو. اصلي ترهګر د پاکستان پوځ او استخبارات دي،چې وسله والې ډلې جوړوي،ملاتړ یې کوي،ترڅو خپل ګاونډیان پرې بې ثباته کړي.»
افغانستان کې د پاکستان د لومړي وزیر وروستۍ څرګندونې دښمنانه بلل شوي دي او دغه هېواد یې تورن کړی دی،چې د وسله والو ډلو ملاتړ کوي،ترڅو د هند او افغانستان پر خلاف یې وکاروي.
د سیاسي چارو یو شمېر کارپوهان وايي، په دې واقیعت نړیوال پوهیږي،چې پاکستان په خپل نیت کې ریښتینی نه دی.
د سیاسي چارو شنونکی توریالی ځاځی وايي:«نړیوال اوس په دې باوري شوي دي،چې پاکستان د ترهګرو ډلو ځاله ده. څو اوونۍ وړاندې د امریکا بهرنیو چارو وزارت پاکستان ته اخطار ورکړ،چې پر کوردننه دې د ترهګرو ډلو مخنیوی وکړي او له منځه دې یوسي. د پاکستان لومړي وزیر څرګندوې په ملګرو ملتونو کې غواړي،چې دغه ټولې بشیري غمیزې،چې د دوی له لاسه افغان ولس او افغانستان ورسره مخامخ شوی دی، پر افغان ولس باندې وټپي.»
ځینې نور بیا وايي،د پاکستان بهرنی سیاست د افغانستان پر وړاندې پېچلی دی او هڅه کوي، د افغان حکومت پر خلاف د وسله والو ډلو ملاتړ وکړي،ترڅو له دې لارې خپلې ستراتیژیکې موخې ترلاسه کړای شي.
د سیاسي چارو شنونکی طارق فرهادي وايي:« کله چې هند او پاکستان د یو بل ترهګرۍ په تړاو خبرې کوي او د افغانستان له نومه استفاده کوي، نړۍ پوهېږي،چې دوی په حقیقت کې د یو بل پر ضد خبرې کوي. نړۍ په دې هم پوهېږي،چې ښايي هېڅ یو یې کافي دلایل ونه لري او افغانستان هلته ( ملګرو ملتونو) کې استازی هم نه لري،چې له ځانه دفاع وکړي،نو ځکه یې نوم په ازاده توګه په منفي ډول اخېستل کېږي.»
په تیرو ۲۰ کلونو کې پاکستان له ورته تګلارې کار اخیستی دی، اوس چې اسلامي امارت واک کې دی،غوښتنه داده چې د پاکستان پر وړاندې خپله تګلاره روښانه او کلک دریځ اختیار کړي او پاکستان ته دې اجازه نه ورکول کیږي،چې نړیوالو غونډو کې د افغانستان په استازیتوب او یا خلاف څرګندونې وکړي.
