د جاپان مخکینی لومړی وزیر شینزو ابې په یوه وسله وال برید کې ووژل شو

د جاپان مخکینی لومړي وزیر شینزو ابې د جمعې پر ورځ د «۱۴۰۱ کال د چنګاښ پر ۱۷ مه» نارا ښار کې  په یوه کمپایني غونډه کې د وینا پر مهال د شاه له لوري په ډزو ویشتل شو.

ابې د سختو ټپونو له امله څو ساعتونه وروسته په روغتون کې ساه ورکړه.

د جاپان اوسني لومړي وزیر فومیو کشیدا، دا یو له وحشت ډک عمل بللی او وايي،د زغم وړ نه دی.

کشیدا  زیاته کړه:« دا له بربریت او وحشت ډک برید و.موږ ته دا د زغملو وړ نه دی. زه یې په ډېرو سختو ټکو غندنه کوم. موږ د پیښې بشپړه څېړنه کوو.» 

امنیتي ځواکونو د پیښې په ځای کې، برید کوونکی نیولی،چې ټېډسویا نومیده او ۳۴ کلونه عمر لري.

بریدګر، ټېډسویا چې د جاپان د سمندري ځواکونو پخوانی غړی دی، پخپلو اعترافاتو کې یې ویلي، له لومړي وزیر ابې ناراضي و او اراده یې کړې وه،چې هغه ووژني.

یوه عیني شاهده  وايي:« د هغه په لاس کې وسله وه او دغه وسله د ماشومانو د لوبو په څېر وه ،و غږ یې ډېر لوړ و. موږ یې په اوریدو له سیمې وتښتیدو.» 

که څه هم بریدګر د شینزو ابې له کړنو په ناراضایتۍ کې پر هغه برید کړی دی،خو جاپاني وګړي پر دغه پیښه ډېر خواشیني بریښي او وايي ابې پخپل وخت کې ډېر کار کړی دی. 

د جاپان یو تن اوسېدونکی  وايي:« زه هیڅ تصور نشم کولای،چې داسې یو څه دې پیښ شي او نه پوهیږم چې دا څه روان دي.» 

د جاپان یو بل اوسېدونکې بیا وايي:«زه شاک شوې یم. ما دا تمه نه لرله، چې داسې څه وشي، هغه پخپل وخت کې ډېر کار کړی دی.» 

د شینزو ابې پر وژل کیدو د نړۍ ګڼو مشرانو هم خواشیني څرګنده کړې او په کلکو ټکو یې غندنه کړې ده.

شینزو ابې په بېلابېلو لوړو پوستونو کار کړی دی،چې بیا د لومړي ځل لپاره په ۲۰۰۶ زېږدیز  کال کې د جاپان د لومړي وزیر په توګه وټاکل شو  او تر ۲۰۲۰ زېږدیز کال پورې یې دوه ځل دغه دنده پرمخ یوړله.