له ۲۴ ورځینۍ خطرناکې او شدېدې جګړې وروسته، امریکا او ایران پر ۱۵ ورځني اوربند سلا شوي او د مخامخ خبرو لپاره يې چمتووالی پيل کړی.
دې جګړې نه يوازې ايران بلکې نږدې ټول منځنی ختيځ لړزولی او اوس تمه ده چې د پای ته رسېدو لپاره به يې پيل کېدونکي مذاکرات مثبته نتيجه ورکړي.
شنونکي د مذاکراتو پايلې ته له دې امله هيلهمن دي چې ګوندي اوسنی لنډمهاله اوربند په دايمي هغه بدل شي او په دې توګه به د سيمې او نړۍ ترڅنګ د افغانستان اقتصادي وضعيت د اغېزمنېدو مخنيوی هم وشي.
د سیاسي چارو شنونکی شهزاده مسعود وايي: « موږ د دې اوربند او مذاکراتو هرکلی کوو او هیله لرو چې کامیاب شي؛ جګړه د حل لاره نه ده او بندېدو سره به یې سیمه کې او نړۍ کې سیاسي او اقتصادي ثبات راشي.»
تحلیلوونکي وايي، څرنګه چې د ایران او امریکا جګړې سیمه اغېزمنه کړې او اقتصاد یې ټکنی شوی، همداسې یې د جګړې پای ته رسېدل هم د سیمې اقتصاد او سوداګرۍ په ګټه دي.
دوی وايي، د هرمز تنګي په بېرته پرانستلو سره به د نفتو ټرانزیټ په عادي ډول سیمې او نړۍ ته پیل شي او د توکو پورته شوې بيې به بېرته عادي حالت ته را وګرځي.
د سیاسي چارو شنونکی نجیب الرحمان شمال وايي: « که څه هم د اوربند لنډمهاله دی، خو زه هیله من یم چې د دې مودې له پای ته رسېدو وروسته اوربند دایمي شي. تاسو ولیدل چې جګړې د نړۍ پر اقتصاد منفي اغېز درلود او که له دې سره د هرمز تنګی خلاص شي، پر اقتصادي او سیاسي اړیکو به ښه اغېز ولري. د دې جګړې پای ته رسېدل پر افغانستان هم مثبت اغېز لرلی شي؛ ځکه افغانستان د طبیعي پېښو له امله د نړۍ مرستو ته اړتیا لري.»
په ټوله کې د امریکا، اسراییلو او ایران ترمنځ له ۴۲ ورځو جګړې وروسته د لنډمهاله اوربند اعلان او د ښکېلو اړخونو له لوري مذاکراتو ته مشروط چمتوالي د سیمې ثبات او ټیکاو په ګټه یادېږي.
د چارو شنونکي د دواړ اړخونو له لوري مذاکراتو ته وړاندې شوي شرایط سخت یادوي، خو تمه ښي چې پایله به ورکړي او سیمه به بېرته خپل عادی حالت ته را وګرځي.
د پوهنتون استاد فیض محمد ځلاند وايي: « داسې ښکاري چې امریکا، اسراییل او ایران حاضر شوي چې د منځګړو په شتون کې خبرو ته سره کېني. دا خبرې به د سیمې په ټپه ولاړ اقتصادي حالت روان کړي او د جګړې تود سنګر به د سولې په ټغر بدل کړي.»
پر ایران د امریکا او اسراییلو له بریدونو وروسته سیمه او د ایران ګاونډي هېوادونه نه یوازې امنیتي بلکې سیاسي او اقتصادي بحران سره مخ شول. په دغو هېوادونو کې د نفتو بیې لوړې شوې او همدا راز ثبات یې زیانمن شو، خو اوس د لنډمهاله اوربند په اعلان سره د وضیعت بېرته عادي کېدو تمې زیاتې شوې دي.
