په داسې حال کې چې په امریکا کې په میلیونونو خلک د ټرمپ د سیاستونو په ضد واټونو ته راوتلي او د بدلون غوښتنه کوي، د هالنډ په هاګ ښار کې هم زرګونه کسانو د لاریون په ترسره کولو د امریکا ولسمشر ډونالډ ټرمپ او د اسراییلو لومړي وزیر بینیامین نتنیاهو په جنګي جرمونو تورن کړي او د محاکمې غوښتنه یې کوي.
د هاګ لاریون کوونکي وايي، د یوه هېواد بمبارول ددې لپاره چې هلته ډیموکراسي او ازادي راوستل شي، د نړیوالو قوانینو سره په ټکر کې دي.
د لاریون یوه ګډونواله وايي: « موږ د دې غیر قانوني جنګ په ضد مبارزه کوو چې د ټرمپ او نتنیاهو له خوا پیل شوی. په یوه هېواد کې د ډیموکراسۍ او ازادۍ راوستلو لپاره د هغه بمبارول له نړیوالو قوانینو سره په ټکر کې دي.»
له دې سره، خپله په متحده ایالتونو کې هم د راپورونو له مخې په میلیونونو خلک واټونو ته راوتلي او د ټرامپ د ادارې په ضد شعارونه ورکوي.
د راپورونو له مخې، اکثریت مظاهره کوونکي پر ایران د بریدونو مخالف او د دې جګړې بندول غواړي.
په واشنګټن کې داسې مهال خلک واټونو ته راوتلي چې پر ایران د امریکا او اسراییلو د بریدونو له پیل میاشت تېره شوه.
یوې ۶۷ کلنې امریکايي ښځې له خبریالانو سره خبرو کې پوښتنه کړې چې په داسې حال کې چې ایران متحده ایالاتو ته کوم ګواښ نه و، نو آيا برید پرې لازم و؟ هغې زیاته کړې: « نه لومړی دا چې دا سمه نه ده او دویمه دا چې دوی د داسې کار حق نه لري.»
ځينو لاریون کوونکو ویلي، د ایران پر ضد د امریکا او اسراییلو جګړه د ټرامپ د هغو هڅو یوه برخه ده چې د جفري ایپسټین د جنسي تېریو له دوسیو څخه د خلکو پام اړولو لپاره یې کوي.
د واشنګټن په لاریون کې یوه برخه اخستونکی ۷۰ کلن سړي چې وايي، د وېټنام په جګړه کې یې برخه اخستې ویلي، ټرمپ فکر کاوه چې په څو ورځو کې به د ایران جګړه پای ته ورسوي او دی به د یو اتل په توګه را څرګند شي.
هغه زیاته کړې: « ټرمپ فکر کاوه چې په څو ورځو کې د ایران جګړې په پای ته رسولو سره به دی یو قهرمان وي. خو ولسمشر ټرمپ ته به اوس معلومه شوې وي چې ایرانیان یې پر وړاندې جنګیږي. موجوده حالت د وېټنام جګړې ته ورته دی.»
په نیویارک کې د ټرمپ ضد لاریون کوونکي بیا په مرکزي منهاټن ښار کې سره راټول شوي وو.
یوې مېرمنې پر ایران د بریدونو د تشرېح پرمهال ویلي، دا جګړه داسې ده لکه د امریکا د مالیه ورکوونکو پیسې ضایع کول.
دا میلیوني لاریونونه د متحده ایالتونو د ټولو ۵۰ ایالتونو په ۳۰۰۰ سیمو کې شوي او تنظیموونکو یې په راتلونکو ورځو کې د داسې لاریونونو خبره کړې چې د امریکا په تاریخ کې به ساری ونه لري.
