امریکا او اسراییلو پر ایران د بریدونو په دوام، تهران کې د نفتو پر چاڼ ځایونو او د تېلو پر سترو زېرمو، بمونه و اورول.
امریکا پر ایران د لا زیاتو بریدونو خبرداری ورکړی او وايي، د ایران حکومت ورته د منلو نه دی او تر هغې به پرې بريدونه کوي چې له منځه يې نه وي وړی او يا يې تسليم کړی نه وي.
د امریکا ولسمشر ډونالډ ټرمپ د ايران په بريدونو د وژل شویو سرتېرو جسدونو ته له سلامۍ وړاندې وايي، له تهران سره خبرې نه کوي او د اټومي پروګرام په اړه يې سولهییز تړون هم نه شي کېدی.
د ټرمپ په خبره، د ایران د دولتي رهبرۍ لویه برخه له منځه وړل شوې او دغه راز د دې هېواد پوځي ځواک په ټولو برخو کې سخت کمزوری شوی دی.
د امریکا ولسمشر ډونالډ ټرمپ وايي: «ما وویل؛ بېقید او شرطه نه مشروط؛ بېقید او شرطه هغه وخت دی چې هغوی تسلیم شي یا ووایي نور بس دی؛ یا هم داسې حالت ته ورسېږي چې نور جګړه نه شي کولی او هېڅوک هم پاتې نه وي چې تسلیمي اعلان کړي. موږ له وړاندې د هغوی رهبري څو ځله له منځه وړې. یا به تسلیمېږي او یا به داسې څوک پاتې نه وي چې تسلیمي ورکړي. په هر صورت، هغه وخت به د پوځ له اړخه بېوسه شوي وي او ګټه به ورته نه لري.»
په ورته مهال، اسراییل هم د ټرمپ څرګندونو ته ورته په ایران کې د واک لوري بدلولو او د اوسني حکومت پر وړاندې پر جګړې ټینګار کړی.
لومړی وزير يې وايي، پر ایران بریدونه یې د خپل هېواد د بقا لپاره دي او تر هغې به دوام ورکړي چې ټاکل شوي اهداف تر لاسه شوي نه وي.
د اسراییلو لومړي وزیر بنیامین نتنیاهو ویلي: « موږ د خپلې بقا لپاره سرنوشت جوړونکې مبارزې کې ښکېل یو. په تېره اوونۍ کې مو د خپلو دښمنانو پر وړاندې په ځواک، نوښت او هوډ سره عمل کړی او د خپلو ټولو اهدافو ترلاسه کولو پورې به خپلې مبارزې ته دوام ورکړو.»
ایران د خپلو دفاعي ځواکونو د کمزوري کېدو خبره نه مني او وايي، د ایران دفاعي او پوځي به له اسراییلو او امریکا څخه د هغو بریدونو غچ حتن اخلي چې د دوی مذهبي مشر او سلګونه ملکیانو په کې ژوند بايللی.
د ایران ملي امنیت عالي شورا منشي علي لاریجاني وايي: « موږ ټرمپ نه پرېږدو، هغه باید تاوان ورکړي. هغه زموږ رهبر او زموږ خلک شهیدان کړي. دا ساده خبره نه ده؛ تر هغې چې غچ وانه خلو او یا باالمثل ځواب ور نه کړو، نه یې پرېږدو.»
علي لاریجاني دا هم ویلي چې په هغو عربي هېوادونو کې به پر امریکايي اهدافو بریدونه ونه درول شي چې ترې پر ايران د بريدونو لپاره کار اخستل کېږي.
د فبرورۍ له ٢٨مې یا د جګړې له پیل راهیسې ښکېل لوري یو بل ته د درنې مرګ ژوبلې اړولو او په پوځي برخه کې د پراخو مالي زیانونو اړولو ادعاوې کوي، خو لا هېڅ یوه لوري ته د اوښتې مرګ ژوبلې په اړه تایید شمېرې نه شته.
