پر ایران د امریکا او اسراییلو ګډو هوايي بریدونه په درېیمه ورځ، دواړو لورو پر یو بل د ویجاړونکو بریدونو ادعاوې کړې.
د راپورونو پربنسټ، ایران د ریښتینې ژمنې(وعده صادق) څلورم پړاو عملیاتو په ۱۰مه دوره کې په سعودي عربستان کې د امریکا پر سفارت د بې پیلوټه الوتکو او د اسراییلو په پلازمینه اتل ابیب او یو شمېر نورو ښارونو د بالیستیک توغندیو بریدونه کړي.
ایران که له یوې خوا د ځوابي بریدونو لپاره په عربي هېوادونو کې د امریکا پوځي اډو او د اسراییلو ویشتلو ګواښونه کوي، خو په ورته مهال د دې هېواد بهرنیو چارو وزیر بیا د تهران پر وړاندې د واشنګټن اوسنی دریځ د امریکا د خلکو غوښتنه نه ګڼي او د اسراییلو د هغو پالیسو برخه یې بولي چې په سیمه کې یې غواړي.
د ایران بهرنیو چارو وزیر سید عباس عراقچي ویلي: « ښاغلي روبیو هغه څه منلي وو چې موږ ټول پرې پوهېږو. امریکا د اسراییلو د خوښې په جګړه کې ښکېله شوې او د ایران له خوا هېڅ داسې ګواښ ورته متوجه نه و. نو د امریکایانو او ایرانیانو دواړو د وینو بهېدنو مسوول هغه کسان دي چې د اسراییلوو غوښتنو ته لومړیتوب ورکوي. امریکایان د غوره ژوند کولو مستحق دي. باید خپل هېواد تر لاسه کړي.»
امریکا د منځني ختیځ په یو شمېر هېوادونو او پاکستان کې د خپلو سفارتونو ورځني فعالیتونه ځنډولي او کارکوونکو ته یې سپارښتنه کړې چې په خوندي سیمو کې پاتې شي.
په ورته مهال، د امریکا ولسمشر په سعودي عربستان کې د امریکا پر سفارت د ایران بریدونو ته په غبرګون کې یو ځل بیا ګواښ کړی چې ایران به د دې بریدونو سخت ځواب وګوري.
ډونالډ ټرمپ ویلي، ایران هېڅکله اټومي وسلو ته نه پرېږدي او هغه مرکزونه به یې ویجاړ کړي چې د اټومي پروګرام غني کولو لپاره کارول کېږي.
د امریکا ولسمشر ډونالډ ټرمپ ویلي: « په ډېرو ساده ټکو یې وایم! هغوی نه شي کولی اټومي وسلې ولري. که هغوی اټومي وسلې ولري، نو په منځني ختیځ کې سوله نه شي راتلی. موږ هېڅ ډول د یورانیمو غني کول نه غواړو. یانې هېڅ غني کول یې نه منو. که هغوی د اټومي پروګرام د بېرته رغونې هڅه وکړي، نو موږ یو ځل بیا اړ یو چې له منځه یې یوسو.»
د ایران پر وړاندې له امریکا سره د اسراییلو د ګډې جګړې د ښکلتیا په اړه د دې هېواد لومړي وزیر بینیامین نتنیاهو ویلي، په ایران کې د حکومت بدلون هغه ګواښونه پای ته رسوي چې اتل ابیب یې د ځان او خپلو متحدینو لپاره جدي بولي.
نتنیاهو دغه څرګندونې وروسته له هغې کړې چې نوموړي په اتل ابیت کې د ایران د توغول شوي توغنديو ویجاړیو څخه لیدنه کوله.
نتنیاهو زیاته کړې: « د تهران ترهګر رژیم ملکیان په نښه کوي او موږ د ملکیانو خوندیتوب لپاره د دې رژیم پر وړاندې جګړه کوو. موږ په دې جګړه کې ځکه ښکېل شو چې موجوده سیمهيیز ګواښونه له منځه یوسو او ایرانیان له استبدادي رژیم څخه خلاص کړو. نو داسې ورځ رانږدې ده چې امریکا او اسراییل به هلته حضور ولري.»
نتنیاهو په ایران کې د استبدادي حاکمیت ادعا داسې مهال کوي چې د امریکا او اسراییلو په ګډو بریدونو کې د فېبرورۍ په ۲۸ مه، د ایران هرمزګان ولایت په میناب ښار کې د نجونو یو ښوونځی په نښه شو او له ۱۶۰ زیاتې زدهکوونکو نجونو په کې ژوند بایلود او لسګونه نورې ټپیانې شوې.
لا کره روښانه نه ده چې تر دې دمه پر ایران د امریکا او اسراییلو بریدونو کې څومره کسانو ته مرګ ژوبله اوښتې، خو یو شمېر ایراني رسنیو راپور ورکړی،چې د مارچ په درېیمه د امریکا او اسراییلو الوتکو یو ځل بیا په تهران او مشهد ښارونو کې هوايي بریدونه کړي او یو شمېر ملکي وګړو ته یې مرګ ژوبله اړولې ده.
