د ۲۰۲۵ کال له پای ته رسېدو سره په هېوادونو کې د لاسته راوړنو په اړه محاسبې روانې دي، خو برعکس پاکستان بيا تر خپل کنټرول لاندې سيمو کې امنيتي پېښې حسابوي.
د دې هېواد شخړو او امنيتي مطالعاتو انسټېټيوټ د ډسمبر په ۲۹مه په پاکستان او تر کنټرول لاندې سيمو کې يې د امنيتي پېښو په اړه څېړنيز راپور خپور کړی چې په کې د جګړې له امله د وژنې ګراف ۷۳ سنله لوړ ښودل شوی.
راپور کې د ۲۰۲۵ کال پرمهال د پاکستان امنيتي پرسونل وژل شوي غړي ۶۶۴ تنه ښودل شوي چې د ۲۰۲۴ کال په پرتله ۲۶ سلنه زياتوالی په ګوته کوي او په دې توګه له ۲۰۱۱ کال راهيسې د مرګ ژوبلې له پلوه ۲۰۲۵ کال د پاکستاني ځواکونو لپاره خورا خونړی ياد شوی.
د پاکستان شخړو او امنيتي مطالعاتو انسټېټيوټ راپور څرګندوي: « د ۲۰۲۴ کال په پرتله چې ۵۲۸ کسان په کې وژل شوي وو، په ۲۰۲۵ کال کې د ۶۶۴ کسانو په وژل کېدو سره د امنيتي پرسونل مرګ ژوبله هم ۲۶ سنله زياته شوې او دا له ۲۰۱۱ کال راهيسې چې د امنيتي پرسونل ۶۷۷ غړي په کې وژل شوي وو، خورا لوړ شمېر دی. د ۵۸۰ ملکي وګړو له وژل کېدو سره د دوی مرګ ژوبلې کچه هم ۲۴ سلنه زياته شوې.»
د پاکستان شخړو او امنيتي مطالعاتو انسټېټيوټ په راپور کې دا هم ويل شوي چې د ناامنۍ ضد مبارزې اړوند پاشلې همغږي، اقتصادي فشارونه او د استخباراتي معلوماتو کموالي، وسلهوالو ډلو ته د بريدونو زياتولو وړتيا ورکړې.
شنونکي دا وضعيت د پاکستان د تګلارو کمزورۍ له امله بولي او زياتوي، دا ضعف د دې سبب شوی چې امنيتي ځواکونو يې د وضعيت مديريت کولو وړتيا وبايلي.
د پوځي چارو شنونکی حکمتالله حکمت وايي: « دا د پوځ د سیاست کمزورتیا ده چې تلفات یې زیات شوي، ناکامۍ یې زیاتې شوې دي او که چېرې د پښتنو او بلوڅانو پر وړاندې له خپلو جنایتکاره سیاستونو لاس وا نه خلي، ښايي د پاکستان پوځ په پښتونخوا او بلوچستان کې په ګونډو شي.»
د چارو ځينې نور څارونکي وايي، د امنيتي وضعيت له خرابوالي سره عام پاکستانيان په تګلارو کې د بدلون مکررې غوښتې کوي، خو په خبره یې، پر وړاندې يې د پوځ بې تفاوتي ښکاره کوي چې دا هېواد له خپلو تګلارو نه اوړي.
د سياسي چارو شنونکی فريدالله ځاځی وايي: « په دې وروستیو کې د پاکستان په داخل او بهر کې دا یوه غوښتنه ډېره زیاته شوه چې پاکستان باید په خپلو پالیسیو کې بدلون راولي، خو داسې ښکاري چې د پاکستان پوځي حکومت د دې کار اراده نه لري.»
د پوځي چارو شنونکی اسدالله نديم وايي: « په ۲۰۲۵ کال د پاکستان امنیتي وضعیت فوالعاده بحراني و، نا امنۍ په کې پراخې شوې، د مخالفینو د بریدونو مقیاس لمنه پراخه شوه، د پوځ او ملکي وګړو تلفات لوړ شول.»
په خيبرپښتونخوا، قبايلي سيمو او پاکستان کې د ناامنيو په اړه کلنۍ اروزنې داسېمهال خپرېږي چې دا هېواد پر اقتصادي او امنيتي ننګونو سربېره له پراخو سياسي ننګونو سره هم مخ دی.
د خيبرپښتونخوا اعلی وزيرسهېل افريدی د تحريک انصاف ګوند بنسټګر او پخواني لومړي وزير عمران خان په لارښوونه له پنجاب وروسته په بلوچستان کې هم د ياد ګوند خواخوږي د اوسني ایتلافي حکومت ضد لویو او پراخو پاڅونونو ته هڅولو پسې وتلی دی.
