د هرات میناتورۍ هنر چې شاوخوا ۶ پېړۍ تاریخي مخینه لري، د استاد کمالالدین بهزاد له زمانې راهیسې د اسلامي نړۍ یو له ارزښتناکو هنري میراثونو ګڼل کېږي.
که څه هم دا هنر تېرو څو کالو کې له پامه غورځول شوی وو، خو اوس تازه یو ځل بیا د غوړېدو په حال کې دی.
هنرمندان وایي، یاد هنر ته اوس د تېر په پرتله د ځوانانو لېوالتیا زیاته شوې او اړتیا ده چې اړوند مسوولین ورته ځانګړې پاملرنه وکړي.
د هرات پوهنتون ښکلو هنرونو پوهنځي استاد احمد شعیب سلجوقي وايي: « ټولې ادارې، له والي صاحب نیولې تر اطلاعاتو او فرهنګ ریاست پورې دې راشي او زموږ ملاتړ دې وکړي. که هره اداره د دې هنر یوه تابلو واخلي او په خپلو دفترونو کې یې کېږدي، د دې ګټه به ډېره وي.»
د پوهنتون استاد احمد ضیا حق شناس وايي: « د دې هنر د ساتلو لپاره باید نندارتونونه جوړ شي؛ ځکه چې ځینې هېوادونه شاید د دې تمه ونه لري چې هرات کې به هم دا هنر ژوندی وي مګر کله چې مخامخ راشي، نو پوه به شي چې اصلي هنر او خزانه افغانستان او په ځانګړې توګه هرات کې ده.»
دوی دا غوښتنه داسې مهال کوي چې د بهزاد میناتورۍ سبک، تازه د ملګرو ملتونو د ښوونیز، علمي او کولتوري سازمان(یونسکو) د ناملموس فرهنګي میراثونو په نوملړ کې ثبت شوی.
د میناتورۍ استادان وایي، د دې هنر ثبت به د میناتورۍ د لا ښه پېژندنې، کولتوري برخه کې د ګرځندویانو جذب او له هنرمندانو څخه د ملاتړ د پیاوړتیا لپاره زمینه برابره کړي.
د هرات پوهنتون ښکلو هنرونو پوهنځي رییس محمد توفیق رحماني وايي: « په یونسکو کې د افغانستان په نوم د دې سبک ثبتېدل ټولو فرهنګیانو او هنرمندانو ته دا امید ورکوي چې افغانان لاهم د هنر او فرهنګ د ودې او تعالي په برخه کې اغېزناګ ګامونه پورته کوي، له خپل فرهنګي هویت او شتمنیو څخه ملاتړ کوي.»
په ورته مهال، د هرات د اطلاعاتو او کولتور ریاست مسوولین وایي، د میناتورۍ هنر تر تخنیکي او فرهنګي پړاوونو تېرېدو وروسته، په رسمي ډول د ملګرو ملتونو د ښوونیز، علمي او کولتوري سازمان د ناملموس فرهنګي میراثونو په نوملړ کې ثبت شوی دی.
دوی ډاډ ورکوي چې د یاد هنر بیا ځل غوړېدو په موخه په ملي او نړیواله کچه نندارتونونو کې هنرمندانو ته د ګډون زمینه برابره کړې.
د هرات اطلاعاتو او کولتور ریاست د فرهنګ او هنر آمر حمیدالله غیاثي وايي: « الحمدالله دلته د پام وړ پرمختګ لیدل کېږي او موږ د هرې ورځې په تېرېدو سره هرات کې د هنري نندارتونونو جوړېدو لیدونکي یو. همدارنګه د فرهنګي او هنري بنسټونو لپاره د رسمي جوازونو اخیستو شاهدان یو.»
استاد کمالالدین بهزاد د نهمې او لسمې پېړیو هغه هنرمند وو چې د میناتورۍ هنر یې د خپل کمال تر لوړې کچې رسولی دی.
دا هنر نه یوازې ګڼ پلویان لري بلکې د هېواد په یو شمېر ګاونډیو هېوادونو کې هم ورته ځانګړي روزنیز مرکزونه جوړ شوي دي.
