د پاکستاني طالبانو تحریک (ټي.ټي.پي) ته منسوبو رسنیو تازه ویډیو خپره کړې او په کې يې د جنوبي وزیرستان په شکي ولسوالۍ کې پاکستاني ځواکونو ته د درنې مرګ ژوبلې اړولو ادعا کړې.
په دې ویډيويي پیغام کې ویل شوي، د يوه بريد پرمهال يې شاوخوا ۲۰ پاکستاني پوځيان وژلي، وسلې او نور مهمات یې هم ترې نیولي دي.
د پاکستاني طالبانو تحریک یو تن غړی وايي: « د شکي په ولسوالۍ کې د تعروض پروګرام و چې په پيل سره مو ۶ یا ۷ کسه له منځه یوړل؛ ورپسې پاکستاني پوځیان له کمپ راووتل، بیا مو پرې برید وکړ.»
په ورته مهال یو شمېر پاکستاني رسنیو راپور ورکړی چې د بلوچستان په عبدالله سیمې جبار مارکیټ کې د پاکستان پوځي مرکز ته څېرمه د سړک پر غاړې ځای پر ځای شوي بم چاودنې ۴ کسان وژلي او ۲۰ نور یې ټپیان کړي دي.
د راپورونو له مخې، په وژل شوسو او ټپيان شویو کې د پاکستان امنیتي ادارو غړي هم شامل دي، خو د برید مسوولیت تر اوسه پورې کومې وسله والې ډلې پر غاړه نه دی اخیستی.
د پاکستان امنیتي وضعیت څارونکي په دې هېواد کې د روانۍ نا امنۍ لوی لاملونه د ياد هېواد له لوري سیمې ناامنه کوونکو پالیسيو تعقیب او د چارواکو له لوري يې د ملي مسوولیتونو پر ځای شخصي منافعو ته لومړیتوب ورکول بولي.
د سیاسي چارو شنونکی عزیز معارج وايي: « دا ډول هېواد خامخا له ستونزو، تجزیې او له هرڅه سره مخامخ کېږي؛ بیا نو دوی شکایت کوي چې هند ملامت دی یا افغانستان او نور هېوادونه. که ته سیسټم جوړ کړې، نظم او اداره جوړه کړې او کنټرول په لاس کې واخلې، په هغه صورت کې تاته ستونزې نه جوړېږي. بنا ً دوی خپله حکومتدارۍ او د پاکستان خاورې ته ژمن نه دي او اعتبار نه ورکوي.»
د سیاسي چارو یو شمېر نور شنونکي بیا د پاکستان دفاع وزیر وروستیو څرګندونو ته چې هېواد یې د امریکا، بریټانیا او لوېدیځوالو پر ګټه د ترهګرۍ ملاتړ پروژه مخته وړې، وايي د پاکستان له ایجاد تر نن پورې په سویلي اسیا کې د ناامنۍ په زیاتولو کې کلیدي رول لوبولی دی.
د چارو شنونکی توریالی ځاځی وايي: « پاکستان په نړۍ کې خپل باور له لاسه ورکړی. اوس ټوله نړۍ په دې پوهېږي چې پاکستان د ترهګرو او تروریستي ډلو ځاله ده. اوس پاکستان ته له درواغو ویلو پرته بل څه نه دي پاتې، ځکه له دې وروسته د دوی په خبرو څوک باور نه کوي. اوس باید نړیوال او په ځانګړې توګه زموږ هېوادوال د پاکستان خبرو ته د یوه وېښته په اندازه اهمیت ورنه کړي.»
له دې وړاندې د هند لومړي وزیر نرېندرا مودي ویلي و چې پاکستان تر هغې د ژوندي پاتې کېدو کم فرصت لري چې د ترهګرۍ له ملاتړ یې لاس نه وي اخيستی.
نوموړي په دې هېواد کې د ترهګرو ډلو موجودیت د ټولې سیمې بې ثباتۍ ته جدي ګواښ بللی دی.
