د پاکستاني طالبانو تحریک(ټي.ټي.پي) په يوه تازه خپره کړې خبرپاڼه کې ادعا کړې چې د جمعې پر ورځ يې د الخندق عملیاتو په دوام پر پاکستاني پوځيانو مرګوني بريدونه کړي.
د خبرپاڼې له مخې، دغه برېدونه د پاکستاني پوځيانو پر پوستو، استخباراتي غړیو او د امنیتي ګزمو پر موټرو شوي چې په پایله کې يې شاوخوا ۲۵ پاکستاني پوځیان وژل شوي او يو شمېر نور ټپیان دي.
د اعلامیې یوه برخه: « د شمالي وزیرستان په دته خېلو او د جنوبي وزیرستان په دشکنۍ سیمو کې د پاکستاني ځواکونو پر امنیتي پوستو په برېدونو کې پوځیانو ته درنه مرګ ژوبله واوښته او دغه راز د جنوبي وزیرستان په تنځه سیمه کې هم د استخباراتو یو افسر ووژل شو. پر دې برېدونو سربېره به د الخندق عملیات دوام ولري.»
په ټولنیزو رسنیو کې د پاکستاني طالبانو تحریک ته منسوبو رسنیو هغه ویډيو لاس په لاس کېږي چې په کې د ټي.ټي.پي له لوري د پاکستاني پوځيانو په نښه کېدل ښکاري.
پر شمالي او جنوبي وزیرستان سربېره، په بلوچستان کې هم د بلوڅ آزادي غوښتونکو له لوري پر پاکستاني پوځيانو د پراخو برېدونو ترسره کېدو ادعا شوې.
د بلوڅانو د آزادۍ غورځنګ په دې اړه خپره کړې خبرپاڼه کې ويلي، د پاکستان امنیتي ادارو پر نږدې ۴۰ اهدافو یې بریدونه دوام لري او د بلوچستان له ځينو سیمو د دې هېواد پوځيان شاتګ ته اړ شوي دي.
د خبرپاڼې یوه برخه:« موږ د بلوچستان په ۳۹ بېلابېلو سیمو کې د پاکستاني پوځيانو پر وړاندې د عملیاتو مسوولیت پر غاړه اخلو. دغه عملیات دوام لري او موخه يې د پاکستان امنیتي پوستو له منځه وړل، د مرکزي لارو تړل، د استخباراتي کسانو نیونه او پر هغو پاکستاني پوځیانو برېدونه دي چې د کانونو په غلا کولو کې شریک دي. د عملیاتو له پای ته رسېدو سره به موږ هر څه رسنیز کړو.»
همدارنګه د پاکستان حکومت په جنوبي وزیرستان کې د پاکستاني طالبانو تحریک له خوا د لسګونو پاکستاني پوځیانو د وژلو په اړه رسمي غبرګون نه دی ښودلی، خو ځينو پاکستاني رسنیو د دې هېواد امنیتي سرچینو له قوله راپور ورکړی چې هلته ۱۵ پوځيانو ته مرګ ژوبله اوښتې.
ډېلي اردو ورځپاڼې په دې اړه لیکلي: « وسله والو د جنوبي وزیرستان په دشکنۍ تحصیل کې د شپې لېدونکو ټوپکو په وسیله د پوځ پر پوستو برید کړی، ۹ پوځيان یې وژلي او ۵ نور يې ټپیان کړي دي.»
د پاکستان پر وړاندې دغه امنیتي ننګونې داسې مهال زیاتې شوې چې دا هېواد له تېرو څلور ورځو راهیسې د هند له هوايي او توغندیزو بریدونو سره هم مخ دی.
د وروستیو راپورونو له مخې، تر دې دمه په يادو بريدونو کې د پاکستان خواته لسګونه کسان چې دا هېواد يې ملکيان، خو هند یې ترهګر بولي، وژل شوې دي.
