شاوخوا یوه اوونۍ وړاندې، د پاکستان حکومت د محمد شریف الله په نوم یو افغان په دې نوم امریکا ته وسپاره چې ګواکې له افغانستانه د بهرنیو ځواکونو د وتلو پر مهال يي د کابل هوايي ډګر په ابي دروازه کې پر امریکايي ځواکونو ځانمرګی برید طرحه کړی و.
محمد شریف الله څو ورځي وړاندی امریکا ته انتقال شو او ولسمشر ټرمپ دا خبره د يو ښه زېري په توګه امريکايانو ته اعلان کړه او وویل چي په کابل کې د وژل شویو امریکايي سرتېرو قاتل يې نيولی دی.
خو اوس تازه د امريکا د پلټنو فډرالي ادارې(اېف.بي.آی) يو مامور د نوموړي مدافع وکيل ته منلې چې د پاکستان له لورې امريکا ته سپارل شوی افغان د تخليې پر مهال د کابل پر هوايي ډګر د بريد اصلي طراح نه دی.
امریکن انلاین رسنۍ لیکلي:« د اېف.بي.آی ځانګړي مامور سېټ پارکر د دوشنبې په ورځ د شریف الله له مدافع وکیل سره خبرو کې ومنله چې نوموړی د فاکس نیوز د راپور پر بنسټ د یاد ترهګریز برید د لوړې کچې پلان جوړونکو څخه نه و. پارکر ویلي، شریف الله ته د داعش د لوړ پوړو چارواکو له خوا د برید ترسره کولو لپاره د څارنې دنده ورکړل شوې وه چې په کې ابي دروازې ته د رسېدو لپاره د سړک څارنه او نورې اړتیا وړ کړنې شاملې وې.»
د اېف.بي.آی مامور دغه راز ويلي، محمد شریفالله په يو شمېر ځانمرګو بريدونو کې لاس لري او د داعش خراسان ډلې غړی دی.
په ورته مهال د سیاسي چارو شنونکي وايي، پاکستان د تل په څېر دوه مخې لوبه کړې او امريکا ته يې د محمد شريفالله په سپارلو سره غوښتل چي د ډونالډ ټرمپ ادارې ته ځان نږدې او خپلې شخصي ګټې تر لاسه کړي.
د سیاسي چارو شنونکی اخترمحمد راسخ وايي: « د پاکستان استخبارات د تروریزم مور ده او په نړۍ کې د ترهګریزو فعالیتونو مرکزي دفتر دی. دوی په تېره نیمه پېړۍ کې د افغانستان له خلکو، جغرافیې، مهاجرتونو او فقر ګټه اخیستې او د خپلو بانکونو ډکولو او ملي ګټو خوندي کولو لپاره یې ترې کار اخیستی. دوی اوس هم تروریستي ډلې لري، جوړوي یې او په راتلونکي کې ترې کار اخلي.»
ځینې نور بیا وايي، پاکستان په خپله پیل کړې لوبه کې پاتې راغلی او په دې سره يې دا ثابته کړه چې پاکستان د ترهګرو ډلو خوندي پټنځای دی.
د سیاسي چارو شنونکی توریالی ځاځی وايي:« امریکا باید دې ته متوجه شي چې د ترهګرو ډلو د روزنې اصلي مرکز پاکستان دی او ترهغو چې پاکستان د نړۍ په نقشه کې موجود وي، ترهګرې ډلې به هم موجودې وي. دا ځکه چې د پاکستان یوازینۍ عایداتي منبع همدا ترهګر او ترهګري ده چې له نړۍ پرې پیسې ترلاسه کوي.»
د ویرجینیا ایالت د یوې محکمې قاضي رسنيو ته ويلي، تورن محمد شريفالله به د محکمې تر راتلونکو ناستو پورې په بند کې پاتې وي.
