پکتیکا د هېواد له لرغونو ولایتونو ګڼل کېږي او په کې لسګونه تاریخي سیمې او لرغوني آثار ثبت شوي دي.
د دې ولایت اوسیدونکي اندېښنه لري،که اسلامي امارت د یادو تاریخي سیمو ساتنې او بیا رغولو ته پام ونه کړي، ښايي ډېری یې بېرته ویجاړې او له منځه لاړ شي.
د پکتیکا اوسېدونکی حاجي کبیر وايي: « له حکومت غوښتنه کوو، چې زموږ تاریخي ځایونه او زیارتونه بیا ورغوي. دا زموږ د نیکونو میراث دی، که ساتنه یې ونه شي، ښايي له منځه لاړ شي.»
ځايي خلک وايي، په تېر کې د نه پاملرنې له امله د پکتیکا ډېری تاریخي سیمې د بارانونو او واورو له امله د ویجاړېدو له ګواښ سره مخ دي.
دوی ټینګار کوي، چې اسلامي امارت دې د تاریخي سیمو ترمیم او ساتنې ته ځانګړی پام وکړي.
د پکتیکا اوسېدونکی حاجي عالم خان وايي: «په پکتیکا کې ډېر تاریخي ځایونه شته، خو پاملرنه نه ورته کېږي.»
د پکتیکا یوبل اوسېدونکی محمد رسول وايي:« تمه لرو، چې دولت دغو تاریخي ځایونو او آثارو ته پاملرنه وکړي.»
اخوا ځایي مسوولین هم په دغه ولایت کې د تاریخي ځایونو او آثارو بیا رغون مهم ګڼي او په دې برخه کې د ځینو پخوانیو کلاګانو او زیارتونو بیا رغونې ته هیله من دي.
د مسوولینو په خبره، که څه هم اړونده وزارت ورسره په یاده برخه کې ژمنه کړې،خو لا هم کوم عملي اقدام نه دی شوی.
د پکتیکا د اطلاعاتو او کولتور رییس محمد امین حذیفه وايي: « څو پخواني زیارتونه دي، د اورګون هشت رخ کلا ده، په خیر کوټ کې یوه تاریخي کلا ده، همدارنګه دلته مرکز ښرنه کې هم يو څو زیارتونه شته، چې بیا رغونې او ترمیم ته جدي اړتیا لري.»
د پکتیکا د اطلاعاتو او کولتور ریاست د مالوماتو له مخې، د دغه ولایت د مرکز ښرنې سربېره په بېلابېلو ولسوالیو کې تر دا مهاله ۱۵۰ تاریخي سیمې او لرغوني آثار ثبت شوي، چې شاوخوا ۱۲۰ یې یوازې په تېرو درېیو کالونو کې د تاریخي آثارو په توګه پېژندل شوي دي.
