په فرانسې کې د جولای پر ۲۶ د المپیک نړیوالو سیالیو پرانیستې مراسم د یو شمېر هېوادونو مشرانو او نړیوالو مطرحو کسانو له لوري په سختو ټکو غندل شوي دي.
د المپیک سږ کال سیالیو پرانیستې مراسم چې د تېرو کلونو پرتله دا ځل په زیات لګښت او متفاوته بڼه د پاریس ښار سن سیند غاړې ته ترسره شول.
په دغو مراسمو کې د عیسویانو پر ځانګړیو مراسمو مسخرې چې د یو شمېر همجنسګرانو له لوري ترسره شوي، د عیسويانو غبرګونونه یې راپارولي دي.
دهنګري لومړی وزیر ویکټور اوربان وايي: «په لوېدیځ کې د اخلاقو په نوم څه نه دي پاتې. موږ دا هر څه د پاریس په المپیک پرانیستلو مراسمو کې ولیدل.»
د ایټالیا لومړي وزیر مرستیال ماتیو سالویني هم په فرانسې کې د المپیک سیالیو د پرانیستې مراسم د مذهبي عقایدو لپاره بد خبر بللی او د نړۍ د میلیاردونو کسانو دین ته په کې شوی سپکاوی يې غندلی دی.
سالویني زیاته کړې:« د نړۍ د میلیاردونو خلکو دین ته په سپکاوي سره د المپیک سیالیو پیل یقینا بد خبر و.»
همدا راز یو شمېر مطرحو څېرو هم پر عیسویت د همجنسګرانو ملنډې دغه دین ته لوی ګواښ ګڼلی او له عیسویانو یې غوښتي، چې د دین دفاع لپاره متحد شي.
د ټسلا کمپنۍ مشر ایلان ماسک وايي:« که د عیسویت د دفاع لپاره په زړورتوب عمل ونه کړو، لرې به نه وي، چې دغه دین له منځه لاړ شي.»
بلخوا د فرانسې ولسمشر ایمانوېل ماکرون چې د ۲۰۲۴ ز کال دالمپیک سیالیو پرانیستې مراسمو کې پر دیني عقاید د همجنس ګرانو غیر اخلاقي تمثیل ته یې غبرګون نه دی ښودلی، په یوه کلمه کې دغو مراسمو ته په اشارې ویلي، دا فرانسه ده.
له دې ورهاخوا د ټولنیزو رسنیو په زرګونه مطرحو نړیوالو شخصیتونو هم د دې سیالیو پرانیسې مراسمو کې همجنس ګرانو له لوري پر عیسوي مذهب ملنډې غندلي دي.
د یادونې وړ ده، چې د فرانسې په کوربتوب د المپیک سږنۍ سیالیو پرانیستې مراسمو ته د شاوخوا ۸۰ هېوادونو مشران هم وربلل شوي وو.
