د زابل شينکۍ ولسوالۍ کې د ميرويس خان نيکه د پلار”ښالم خان کلا “چي د اټکل له مخې دوې پېړۍ وړاندې له کاره لوېدلې او وروسته طبعي افاتو او په دغه ودانۍ کې د شته کسانو اختلافاتو دغه لرغونې ودانۍ د ورانېدو له ګواښ سره مخ کړې.
محمد عمر د زابل ولايت د شينکۍ ولسوالۍ اوسېدونکی ځان او کورنۍ د ښالم خان لمسیانو ته منسوبوي، د ده په خبره کورنۍ یې له پیړیو راهيسې په دې کلا کې اوستېدلې؛ خو د تېر جمهوري نظام پر مهال د دولت په سپارښتنه په دې موخه بل ځای ته وکوچېدل چې د یادې کلا د بیا جوړېدو چارې پیل شي .
عمر وايي: « موږ دلته د ښالم خان چې د میرویس نیکه پلار دی له وخت راهیسې پاتې یو او دغه برج د هماغه وخته راپاتې پخوانی برج دی. د تېر حکومت پر مهال اشرف غني اعلان وکړ چې موږ د ښالم خان کلا جوړوو، په دې کې ډېرې کورنۍ پرتې وې، دولت ورته وویل موږ د دې پیسې درکوو، دا کلا خالي کړئ؛ نو له همدې امله بیا کورنۍ ګډه شولې.»
د شينکۍ ولسوالۍ یو شمیر نور اوسېدونکي بیا په دې باور دي که چېرې د دغې تاریخي ابدې پاتې رغنيزې چاري بشپړه نه شي، ښایي راتلونکې طبعي پېښي او بارانونه د دغې کلا هغه برخې هم بېرته اغېزمنې کړي، چې دوه کاله وړاندې رغېدلې وې .
د زابل اوسېدونکی سردارجان وايي: « دا د میرویس نیکه د پلار ښالم خان کلا وه، له هماغه وخته پاتې وه، بیا د ده اولاده ډېرېده ډېرېده کلی ترې جوړ شو، کلا چې تنګه شوه؛ نو شاوخوا ووتل.»
د زابل یو بل اوسېدونکی اخترمحمد وايي: « دې کلا ته سېلانیان راځي ګوري یې، لکه تاسې چې راغلي یاست، دغسې نور کسان هم راځي او ګوري یي.»
د زابل اوسېدونکي ولي خان وايي: « د دې کلا ناوې خرابې شوې، کله چې باران وشي نو دا نړېږي، باید دې ته پاملرنه وشي او پاتې چارې یې بشپړې شي، ځکه دستي د حکومت له لوري یې کار ځنډول شوی دی.»
د زابل د اطلاعاتو او کلتور مشر مولوي رحمت الله حماد په دې اړه د دوامدارو هڅو خبر ورکوي او وایي، اميد شته چې ډېر ژر به د یادې کلا ۳۵ سلنه رغنيزې چاري هم بشپړه شي .
حماد تمه ښي، چې د مرکز په همکارۍ به د دغې لرغونې کلا رغنیزې چاري راپیل کړي .
هغه زیاتوي: « موږ په باربار هڅه کړې چې د ښالم خان کلا رغنیزې چارې پای ته ورسېږي او دا پروژه خلاصه شي، له دې وروسته به هم هڅه کوو چې د ولایت په کچه او د مرکز کابل په کچه خپلې هڅې وکړو او د کلا کار پای ته ورسوو، هیله لرو چې په نږدې وخت کې د دې پروژې کار پای ته ورسېږي او د ښالم خان کلا په اساسي ډول ورغول شي.»
د یادولو وړ ده، چې په ۱۳۹۸ کال کې د تېر جمهوري نظام د اطلاعاتو او کلتور وزارت له خوا د ښالم خان کلا د بیا جوړولو چارې عملًا په ۲۲ میلیونه افغانۍ د دوه کالونو په موده کې«يوه ساختماني شرکت» ته په قرارداد ورکړل شوې؛ خو د تېر نظام تر سقوط پورې د ښالم خان کلا کارونه پنځه شپېته ۶۵سلنه بشپړه او ۳۵ سلنه باقي پاتې شول.
