په پاکستان کې د مخکيني لومړي وزیر عمران خان له نیول کېدو سره، دغلته سياسي ناورین تر دې حده پراخ شوی، چې اغېزې يې د پوځ تر هستې رسېدلي دي.
شمشاد ټلوېزيون ته په پاکستان کې يوې سرچينې په پوځ کې تازه رامنځته شوي اختلافونه تائید کړي او زیاتوي،چې د پنجاب، سيند او خيبر پښتونخوا د قول اردو قوماندانان د پوځ متقاعد جنرال فېض حميد ته وفادار کسان دي او خپله فېض حمید بیا په لوړه کچه د عمران خان پلوی دی.
د سرچينې د مالوماتو له مخې،د يادو قومندانانو اختلاف د پوځ له لوی درستز عاصم منير سره پر دې دی، چې په ملکي سياست کې د پوځ کړنې سم نه دي او دا کار وضعیت بحراني کوي.
د سرچينې په خبره، تر دې مهاله ۲۵۰۰ پوځيانو، چې له ډلې يې ۲۰۰ تنه لوړپوړي افسران دي، په پوځ کې د موجوده اختلافونو له امله له دندو استعفاوې کړي. په دې مستعفي افسرانو کې تر ډېره سيندي او پښتانه افسران شامل دي.
د پاکستان په پوځ کې د درز رامنځته کېدو بحث تر دې حده ګرم دی، چې پاکستاني خبريالان او د خواله رسنيو کاروونکو پر تبصرو سربېره، خپله پوځ ته له منسوبو ادرسونو هم د يادو اختلافونو د مهوه کولو هڅې کېږي.
د پوځ وياند احمد شريف چودري هم له یوه خصوصي ټلوېزيون سره مرکه کې دغه اختلافونه تشې اوازې بللي او زياته کړې يې ده،چې د پوځ رهبري متحده ده.
د بحران په دوام سره مخکېني لومړي وزیر عمران خان په اسلاماباد کې له خپلو پلویانو غوښتنه کړې،چې د بې عدالتۍ خلاف اعتراض وکړي.
نوموړي د پنجاب په شمول د پاکستان په نورو سیمو کې هم د مې په ۱۷مه د ورته اعتراضونو د کولو غوښتنه کړې ده.
