د هلمند د سوداګرۍ او پانګونې خونه وایي، د پاکستاني لارو تړل کېدو افغان سوداګرو ته فرصت په لاس ورکړ چې له نورو هېوادونو سره د سوداګریزو اړیکو په پراخولو، ځان د پاکستان له انحصاره خلاص کړي.
د دې خونې چارواکي وايي، د افغانستان او پاکستان ترمنځ د سوداګریزو لارو تړل کېدو افغان سوداګرو ته نوي فرصتونه برابر کړي او توانېدلي چې له نورو هېوادونو سره سوداګریزې اړیکې پراخې کړي.
دوی زیاتوي، بنګله دېش، ترکیه او ایران د پنبې درې ستر بازارونه دي چې اوسمهال د هلمند پنبه له پاکستان څخه په لوړه بیه پېري.
د هلمند سوداګرۍ خوني رییس غلام یحی پښتون وايي: « د پاکستان په ځای مو له بنګله دېش سره د پنبې خبره کړې، له ترکیې سره مو کړې؛ ایران ته عملا ً د پنبې صادرات پيل شوي او په نورو بدیلو لارو هم کار کوو. له پاکستان سره د لارو بندېدل د افغانستان په زیان نه بلکې په ګټه دی؛ ځکه چې موږ د پاکستان له انحصار ځان خلاص کړ او بدیلې لارې مو پیدا کړې. موږ اوس خپل توکي او تولیدات په ډېره لوړه بیه نورو هېوادونو ته صادروو.»
د پښتون په خبره، افغانستان په وچه کې ایسار هېواد په توګه د ټرانزیټ حق لري او پاکستان مجبور دی چې افغان سوداګرو ته له خپلو لارو د سوداګرۍ اجازه ورکړي.
نوموړی په افغانستان کې د پانګونې لپاره د زمینې برابرېدو خبره کوي او له پانګوالو غواړي چې هېواد کې پانګونه وکړي.
غلام یحی پښتون په دې اړه وايي: « موږ په خپلو ټولو تجارانو که دا په داخل کې دي که په خارج کې، غږ کوم چې اوس په هېواد کې پانګونې ته بهترین فرصت برابر شوی، حکومت د پانګوالو ملاتړ کوي او دوی دې هم راشي دلته دې پانګونه وکړي.»
بله خوا، د هلمند اوسېدونکي او سوداګر د بدیلو لار موندل د هېواد لپاره یو ښه زیری بولي، خو له پانګوالو غواړي چې د صنعتي کارخونو په جوړولو سره، د هېواد اړتیاوي پوره او ځوانانو ته د کار زمینه برابره کړي.
سوداګر صالح محمد رودي وايي: « دلته هلمند کې د پنبې فابریکې شته، خو د نورو توکو نه شته. که زموږ پانګوال راشي او دلته پانګونه وکړي، دا به ډېر ښه شي. دېته د ولس او خلکو ډېر ضرورت دی.»
د هلمند اوسېدونکی الله داد وايي: « زموږ جنس پاکستان ته ځي او له هغه ځایه بېرته په موږ په دوه چنده پلورل کېږي. که موږ خپلې کارخونې ولرو، هم به مو خلک په کار کوي او هم به خپل توکي ولرو.»
د افغانستان او پاکستان ترمنځ د لارو له تړل کېدو وروسته، داسې ګومان کېده چې ورسره به د افغانستان اقتصاد کمزوری شي؛ خو د درېیو میاشتو په تېرېدو سره نه یوازې د افغانستان اقتصاد کمزوری نه شو بلکې لا پیاوړ شوی.
اوسمهال افغان سوداګر له پاکستان پرته، نورو ټولو ګاونډیو هېوادونو او نړۍ سره توده سوداګري لري.
