په هرات ولایت کې د ۳۵۰ لویو او کوچنیو کارخونو د جوړولو له لارې د یو نیم میلیارد ډالرو په ارزښت پانګونه شوې چې ورسره زرګونو کسانو ته د روزګار زمینه هم برابره شوې ده.
ځايي چارواکي دغه پانګونه د هرات ولایت په صنعتي ښارګوټي کې د یوه ستر پرمختګ په توګه یادوي او وايي، له دې پانګونې سره په هرات کې تولیدي ظرفیت هم لوړ شوی.
د چارواکو په خبره، د کورنیو تولیداتو پیاوړي کول له اقتصادي پلوه د هېواد ځان بسیاینې زمینه برابروي.
د هرات والي ویاند محمد یوسف سعیدي وايي: « د تېر میلادي کار په اوږدو کې په هرات ولایت کې له ۳۵۰ ډېرې لویې او کوچنۍ کارخونې تولیدي فابریکې د هرات په صنعتي ښارګوټي کې فعالې شوې او دا په هرات ولایت کې د صنعتي ودې څرګندونه کوي.»
د هرات صنایعو او کانونو خونې ريیس عبدالناصر امین وايي: « په ۲۰۲۵ کال په هرات ولایت کې سترې پانګونې وشوې، سلګونه نوې فابریکې فعالې شوې. تر ټولو کوچنۍ فابریکه چې فعاله شوې وي، له یومیلیون کمه پانګونه په کې نه ده شوې. تر ټولو ستره فابریکه د المونیمي قطیو جوړولو فابریکه وه چې ۱۲۰ میلیون ډالره پانګونه پرې شوې.»
که څه هم په هرات کې تېر کال د صنعت په برخه کې پرمختګ شوی، خو لا هم د دې ولایت په صنعتي ښارګوټي کې د امکاناتو کمښت د ځینو پانګوالو د پانګونې پر وړاندې خنډونه جوړ کړي. پانګوال وایي، که دا ستونزې حل شي، نو د پانګونې ساحه به نوره هم پراخه او ګڼ شمېر نوي تولیدي او صنعتي پروژې به عملي شي.
صنعتکار حیات الله نظري وايي: « که صنعتکارانو ته برېښنا او ځمکه په واک کې ورکړل شي، سلګونه زره سوداګر او صنعتکاران شته چې د زمینې برابرېدو ته انتظار دي، ترڅو پانګونه وکړي.»
صنعتکار محمد ظریف اسحاقزی وايي: « د ۲۰۲۶ کال لپاره موږ له حکومت دا غوښتنه لرو چې صنعتکارانو ته ځمکې او برېښنا په واک کې ورکړي، ترڅو د وطن او خلکو لپاره کار وکړي.»
د هرات په صنعتي ښارګوټي کې د امکاناتو کمښت ته دا اشاره داسې مهال شوې چې تېر کال په هرات کې د برېښنا نهه سترې پروژې پرانستل شوې دي چې د چارواکو په وینا، په بشپړېدو سره به یې په دې ولایت کې د صنعت په برخه کې ټولې ستونزې حل شي.
له یادې پانګونې سره نه یوازې د هرات صنعتي ظرفیتونه لوړ شوي بلکې زرګونه کسانو لپاره د کار زمینه هم برابره شوې ده. دلته په کار بوخت کسان ټینګار کوي چې په هېواد کې باید پانګونه لا زیاته شي، ترڅو ورسره بې روزګاري ختمه او د کډوالۍ مخه ونیول شي.
د هرات اوسېدونکی سهراب عطایي وايي: « اوس هم ښه کارونه روان دي او ډېر هغه کسان چې له ایران څخه راشړل شوي، دلته په کارونو بوخت کړای شوي دي.»
د هرات اوسېدونکی میرویس عليزاده وايي: « زه اته کاله ایران کې وم، اوس دلته هرات کې په یوه کارخونه کې بوخت یم. زه له خپلو کارونو راضي یم.»
د چارواکو د معلوماتو له مخې، دا مهال د هرات صنعتي ښارګوتي کې څه باندي ۱۲۰۰ کارخونې فعالیت لري چې شاوخوا ۱۶۵ زره کسان په کي په کار بوخت دي.
