د عامې روغتیا وزیر مولوي نور جلال جلالي تازه له هندوستان راستون شوی او دلته له خبريالانو سره د خپل سفر لاسته راوړنې شريکوي.
جلالي وايي، له هندي چارواکو يې نه يوازې د روغتيايي پرسونل د ظرفيت لوړولو بلکې په ټوله کې د روغتيا سکټور د پياوړي کولو لپاره ډېرې ژمنې ترلاسه کړې دي.
د نوموړي په خبره، د ژمنو يوه مهمه هغه يې افغانستان ته د باکيفيته درملو صادرولو ترڅنګ، د افغانستان په داخل کې د درملو په توليد کې د هند پانګونه ده.
د عامې روغتیا وزیر نور جلال جلالي وايي: « د څو اتحادیو له مسوولینو سره مو مجلسونه وکړل؛ د درمل واردولو او په دې برخه کې د پانګونې په اړه یې اوږدمهاله او لنډمهاله ژمنې وکړې. لنډمهاله دا چې اوس رامنځته شوې تشه باید له هرې لارې چې وي، باید ډکه شي؛ اوږدمهاله دا چې هغوی دلته افغانستان کې د درملو د تولید په برخه کې پانګونه وکړي او فابریکې جوړې کړي، دوی دې کار ته لېوال وو. دوی دا ژمنه هم وکړه چې افغانستان ته صادرېدونکي درمل به باکیفیته وي او بیې به یې ارزانه وي.»
د دوديزې درملنې(سنتي طب) معياري کول، د طبي انسټېټيوټ جوړول او سرطان په درملنه کې همکاري د هند نورې هغه ژمنې دي چې له امله يې د عامې روغتيا وزير ياد هېواد ته له پنځه ورځني سفر وروسته ډک لاسونه راستون شوی.
د عامې روغتیا وزیر په دې اړه وايي: « په کابل کې د دودیزې درملنې د یوه مرکز او انسټیټیوټ جوړېدنه، افغانستان ته د با کیفیته درملو رالېږل او د مارکېټ اړتیا پوره کول. د هند هېواد له لوري د نورو کړنو ترڅنګ، د روغتیا او درملنې په برخه کې افغانستان کې پانګونه کول او ځینې نوروې مهمې مرستې شاملې دي. د سرطاني ناروغیو په تړاو د ځان بسیاینې په لپاره په څلورو پړاوونو کې مرسته کېږي، روزنه، درمل، طبي تجهیزات او نور په کې شامل دي. موږ دا سفر له هند سره د اړیکو نوی باب ګڼو.»
جلالي د جزئياتو په توګه زياتوي، هند به د اوس لپاره د پنځه ميلیون ډالرو په ارزښت بېلابېل واکسینونه افغانستان ته ورکړي، د درې ميلیونه ډالرو په ارزښت به د سرطاني ناروغیو راډيو ټرافي ماشینونه ورته وپېري، د یو ميلیون ډالرو په ارزښت به د سرطاني ناروغیو پنځه ټنه درمل او د درې سوه زره ډالرو په ارزښت به د سیټي سکن ماشینونه ورکوي او دغه راز به د پنځه سوه زره ډالر په ارزښت د تلیسمیا د درملنې یو مرکز هم جوړي.
نورجلال جلالي په دې اړه وايي: « ښه زېری دا دی چې د هند روغتیا وزیر وویل چې هڅه کوي افغانستان د روغتیا له پلوه پر ځان بسیا هېواد جوړ شي.»
ډاکټران هم په طبي لحاظ هند پياوړی ګڼي او ډاډه دي چې له افغانستان سره به يې د همکاريو دوام د هېواد روغتيا سکټور پياوړی کړي.
د داخله ناروغیو متخصص عبدالحق قاضيزاده وايي: « د دوی د درملنې طرز، د دوی د تشخیص او ټکنالوژۍ ډول د هر ډول ناروغیو په برخه کې معیاري او ستندرد دی. نو دا هېواد که له موږ سره د زړه له تله مرسته وکړي، هم د طبي پرسونل د روزنې او هم د درملو د تولید په برخه کې مثبت اغېز لرلی شي.
نورجلال جلالي په هند کې د روغتيا له نړيوال سازمان ریيس سره هم ليدلي و او ورسره يې په هېواد کې د ګوزڼ(پولیو) د تشخيص معیاري لابراتوار پر جوړولو، له افغانستان سره پر نړيوال روغتيايي ملاتړ، د روغتونو پر تجهيز او د روغتيا اړوند په نړيوالو غونډو کې د افغانستان د استازو پر ګډون، خبرې کړې دي.
