له پاکستان سره د سوداګرۍ محدودولو په اړه د حکومت لارښوونې په چوکاټ کې کرار کرار د افغانستان په بازارونو کې د نورو هېوادونو د توکو ونډه په زياتېدو ده.
په همدې تړاو د درملو توریدي شرکتونو اتحادیه د درمل تولیدولو د یوه هندي شرکت د فعالیت پیلولو په مراسمو کې خپلې غوښتنې وړاندې کوي.
د دې اتحاديې مسوولان وايي، په پاکستان کې يې د درملو شاوخوا ۱۵۰۰ کانټينر ایسار دي او اړ دي چې د دې هېواد په ځای له نورو هېوادونو د درملو واردات پيل کړي.
دوی له حکومت غوښتنه کوي چې له نورو هېوادونو د درملو واردولو په برخه کې ورته اسانتياوې برابرې کړي.
د درمل واردوونکو شرکتونو اتحادیې مرستیال محمد یعقوب منګل وايي: « علت دا دی چې نظام هم موږ ته سهولتونه نه دي برابر کړي، پر موږ نه هېرېدونکې ناخوالې تېرې شوې دي. پاکستان فرضي کرښه تړلې او هلته زموږ تر ۱۷۰۰ کانټینر درمل پاتې دي. پر دغو کانټینرو هره روځ تر ۵۰۰ ډالرو مصرف راځي.»
همدارنګه دا اتحاديه مني چې اوسمهال په بازارونو کې د درملو بيې لوړې شوې، خو د احتکار ردولو ترڅنګ يې لامل د لارو بندښت او د پاکستاني درملو د وارداتو بندېدل يادوي.
محمد یعقوب منګل په دې اړه وايي: « دلته تجاران شته دي، موږ په مجموع کې شاوخوا ۴۰۰ درمل وارېدونکي شرکتونه لرو. اکثریت شرکتونه د درملو کیفیت او قېمت ته ژمن دي، خو بیا هم موږ غوښتنه کوو چې د ښه کیفیت درمل وارد کړي، ترڅو د ګاونډيانو له ظلم خلاص شوو.»
د درمل وارېدونکو اتحاديه په افغانستان کې د پاکستان برعکس د نورو هېوادونو اړوند د درملو توليدوونکو کمپنيو د استازولیو پرانیستل مهم بولي او زیاتوي، دغه کار د باکیفیته وارداتو او د درملو د بیو په کمښت کې رول لري.
د درمل واردوونکو شرکتونو اتحادیې د رهبرۍ غړی اسدالله ایماق وايي: « هېواد کې د درملو بازار د وضعیت په اړه معلومات لرو. بېوزله او نادار خلک نه شي کولی خپلې ستونزې رفع کړي؛ د دوی تکیه زموږ پر همدې درملیزه کورنۍ ده او غوښتنه کوي چې ښه او مناسب قېمت لرونکي درمل وارد کړو.»
د صنعت او سوداګرۍ وزارت او د افغانستان او پاکستان د سواګرۍ ګډې خونې له مسوولانو سره له پرله پسې اړيکو سربېره هم، خپل نظر له موږ سره شریک نه کړ.
له دې وړاندې حکومت ډاډ ورکړی چې له نورو هېوادونو سره د سوداګرۍ پراختيا لپاره هڅه کوي او سوداګرو ته به اړينې اسانتیاوې برابرې کړي.
