هرات کې د ایران خراسان رضوي ولایت او هرات سوداګرو ترمنځ د کرنې او مالدارۍ برخو کې د همکاریو زیاتوالي په موخه ګډه ناسته جوړه شوه.
د دې ناستې پرمهال په هرات کې د معیاري کرنې برخه کې د ایراني پانګونې، دې هېواد ته د غوښې صادراتو او دلته په هرات کې د لبلبو او پنبې پر کښت هوکړې وشوې.
د هرات کرنیزو او مالدارۍ محصولاتو خونې رییس بشیر احمد بهادري وايي: « موږ باید د کرنې په برخه کې همکاري ولرو. همدارنګه موږ د غوښې د صادراتو په اړه هم له هغوی سره هوکړه وکړه او که خدای کول ډېر ژر به سره غوښه له هرات څخه ایران ته صادره کړو. د کرنې په برخه کې د څارویو د مسلکي روزنې په برخه کې هوکړې وشوې.»
ایراني سوداګر کوروش شجاعي وايي: « کومې هوکړې چې وشوې، په څو حوزو کې وې. د مثال په توګه د مشارکتي کرنې په برخه کې هوکړه وشو او ټاکل شوې چې د لبلبو، پنبې، جوارو او نورو بوټو د کرنې په برخه کې همکاري ولرو.»
په ورته مهال د مالدارۍ برخه کې هم د ستونزو حل په موخه دواړو خواوو له ایران څخه د غواګانو بشپړ خوراکي توکو وارداتو، مالدارۍ برخه کې له ایران څخه د تخصصي پوهې لېږدولو، هرات کې د مالدارۍ صنعتي کولو او مالدارۍ او کرنې برخه کې د تحقیقاتي فارمونو جوړولو باندې هم ټینګار وشو.
د هرات کرنیزو او مالدارۍ محصولاتو خونې د اقتصادي ډېپلوماسۍ مسوول اسدالله حبیبي وايي: « د کرنې او مالدارۍ په برخه کې موږ ډېر امکانات لرو. کولی شو په دې برخه کې ځینې درمل هم تولید کړو، کرنه مکانیزه کړو، ټکنالوژي را انتقال کړو او د کرنې او مالدارۍ څېړنیز فارمونه جوړ کړو. په دې اړه مفصلې خبرې وشوې.»
هرات کې د غواګانو لرونکو فارمونو ټولنې رییس غلام محمد امیري وايي: « په دې اړه هوکړه وشوه چې د مالدارۍ په برخه کې زموږ پر شته ستونزو چې تر ډېره د تغذیې په برخه کې دي، کار وشي. د ډېرو شیدو لرونکې غواګانې ښې او بشپړې تغذیې ته اړتیا لري.»
بله خوا، د هرات ځایي چارواکي د یادو هوکړو ترسره کېدل هېواد کې د خلکو لپاره د کارموندنې او همداراز کرنې او مالدارۍ برخو کې د ایراني متخصصینو له خوا ترسره کېدونکو څېړنو او تخصصي پوهې څخه ګټه اخیستلو لپاره ګټورې بولي.
د هرات کرنې، اوبولګولو او مالدارۍ ریاست د کرنیزو چارو آمر بشیر احمد احمدي وايي: « یو ډېر ښه ګام پورته شو او زه په نېک فال ورته ګورم. دغه ګام به دغو کسانو لپاره ډېر کاري فرصتونه برابر کړي چې له ایران څخه تازه راستانه شوي. همدارنګه موږ کولی شو په دې برخه کې د ایرانیانو له تجربو ګټه واخلو.»
د یادونې ده چې هرات ته د ایران خراسان رضوي ولایت د والي په مشرۍ یو پلاوی هم تېره اوونۍ راغلی و او دلته يې له بېلا بېلو چارواکو او مسوولینو د دوه اړخیزو اړیکو پر پراختیا خبرې وکړي.
د پلاوی له راتګ وروسته ناسته داسې مهال ترسره کېږي چې همدا تېره اونۍ ترکیه کې د تهران او کابل د سوداګرۍ برخې وزیرانو هم پر دوه اړخیزو سوداګریزو اړیکو خبرې وکړې.
