د افغانستان د صنعت او سوداګرۍ وزیر وايي، هند ته له خپل اوسني سفره راضي دي او هیله لري چې له هندي لوري سره شوې خبرې به دوه اړخیزې اقتصادي اړیکې او سوداګریزه راکړه ورکړه لا پراخه کړي.
نورالدین عزیزي چې نن دوشنبه یې د دې سفر او شویو خبرواترو په اړه خبریالانو ته معلومات ورکول ویلي، کابل او نوي دیلي دواړو کې دا ظرفیت موجود دی چې شته اقتصادي او سوداګریزې اړیکې لا پراخې کړي.
د صنعت او سوداګرۍ وزیر نورالدین عزیزي وايي: « دا چې په دواړو هېوادونو کې دا امکان او ظرفیت موجود دی او زموږ خصوصي سکټور غواړي چې په دې پروګرام کې ښه کار وکړي. ځینې واړه مسایل، د بېلګې په توګه د وېزو ستونزه او د هوايي کارګو د لوړو بیو ستونزې موجودې وې. موږ د دې مسایلو د حل لپاره دلته راغلي یو او الحمدالله تاسو یې ټکی په ټکي وایم چې دا ټول مسایل مو حل کړل. اوس تمه دا ده چې د دواړو هېوادونو ترمنځ اقتصادي او سوداګریزې اړیکې او پانګونه لا پراخ شي.»
د عزیزي په خبره، اوس مهال د افغانستان او هند ترمنځ سوداګریزه راکړه ورکړه د کال تر یو میلیارډ ډالرو رسیږی، خو دوی غواړي چې دا راکړه ورکړه لا زیاته شي.
نور الدین عزیزي په نوی دیلي کې خبریالانو ته دغه راز ویلي، دوی به د دغو اړیکو او سوداګریزې راکړې ورکړې د پراخولو لپاره د چابهار بندر او هوايي دهلېز په ګډون له ټولو ممکنه لارو ګټه واخلي.
نورالدین عزیزي دغه راز ویلي: «د چابهار بندر د کارولو په اړه چې مو ویلي وو، دلته مو په دې موضوع هم خبرې وکړې. د هوايي کارګو په برخه کې لا کار روان دی او هڅه کوو چې له تخنیکي پلوه لا زیاتې اسانتیاوې برابرې شي او لا زیات فعال شوو.»
د صنعت او سوداګرۍ وزیر چې دا مهال په یوه پنځه ورځني سفر نوي ډیلي کې دی، تېره ورځ یې د هند بهرنیو چارو وزیر جی شنکر سربېره په سوداګریزو چارو کې د هند د دولت له وزیر او د خصوصي سکټور له غړیو سره هم لیدلي.
د افغانستان د صنعت او سوداګرۍ وزیر دغه راز ویلي، له هندي پانګوالو سره یې لیدنې خورا ګټورې وې او په کې افغانستان کې د پانګونې پر موجوده امکاناتو او اسانتیاوو خبرې شوې.
د ورکړل شویو معلوماتو له مخې، هندي پانګوالو په افغانستان کې په بېلابېلو برخو کې له پانګونې سره هم خپله لېوالتیا څرګنده کړې.
له پاکستان سره د سوداګریزو اړیکو له پرې کولو وروسته، اسلامي امارت او افغان سوداګر دواړه هڅه کوي چې د سیمې او نړۍ له هېوادونو سره د سوداګریزې راکړه ورکړې لپاره بدیلې لارې پیدا کړي.
