روغتیا پالان وايي، بلخ کې د وروستیو څو کالو ګرمې هوا له امله د پوستکي سرطان ناروغي زیاته شوې او په تړاو یې د دې ولایت د خلکو ترمنځ اندېښنې را پورته شوې دي.
د بلخ ابوعلي سینا بلخي روغتون ډاکټران وایي، تېرو څوارلسو میاشتو کې د شاوخوا ۱۰۰ تنو پر دغې ناروغۍ اخته کسانو درملنه شوې.
د بلخ ابوعلي سینا بلخي روغتون د پوستکي ناروغیو څانګې مسوول ډاکټر ملک اصغر وايي: « اول به دغه ناروغان له ولایت یا هېواد څخه بهر د تداوۍ لپاره وړل کېدل، خو اوس موږ کولی شو په ابوعلي سینا بلخي روغتون د پوستکي درملنې څانګه کې علاج وکړو. موږ تېر یوه کال کې د پوستکي سرطان پر ناروغۍ د اخته څه باندې ۱۰۰ کسانو بریالي عملیاتونه کړي. یوازې د سږ کال له پیله مو بیا ۲۰ عملیاتونه کړي، همداراز اوونۍ کې دوه عملیاتونه لرو.»
روغتیا پالان وايي، په کورونو کې له پخوا راهیسې دغه ناروغۍ موجودې وې.
د دې ناروغۍ یو له عواملو په ګرمۍ کې ګرځېدل دي. ډاکټران په دې برخه کې روغتیایې لارښوونو ته پاملرنه مهمه بولي.
د بلخ ابوعلي سینا بلخي روغتون د پوستکي ناروغیو څانګې مسوول ډاکټر ملک اصغر وايي: « مختلف فکټورونه شته چې د پوستکي سرطان لامل ګرځي. اولین فکټور چې یاده ناروغي زېږوي، هغه د لمر مضرې شعاوې دي. کوم کسان چې دوبي کې له ۱۲ تر ۳ بجو دوامداره ګرمې هوا ته ګرځي، د پوست سرطان باندې اخته کېږي.»
د پوستکي پر ناروغۍ اخته کسان یاده برخه کې د روغتیا پالانو سپارښتنو ته پام کول مهم بولي.
ناروغ سنت الله وايي: « پر دې ناروغۍ شاوخوا دوه کاله وړاندې اخته شوی وم. ورځ تربلې مې ناروغي ډېرېدله، ځورولم یې؛ بلاخره مې عملیات وکړل. دلته د ډاکټرانو له خدماتو خوښ یم.»
د یوه بستر ناروغ پایواز معراج الدین وايي: « یوه میاشت وړاندې یې پر مخ دانه پراخه شوه، دلته روغتون ته راغلو، د ډاکټرانو هلو ځلو او د الله(ج) په مدد مو ناروغ عملیات شو؛ اوس ښه دی.»
روغتیا پالان د پوستکي ناروغیو د انتقال په مخنیوي کې د حفظ الصحې ساتل او پر وخت د یادې ناروغۍ درملنه مهمه بولي او وايي، دا ناروغي نورو کسانو ته هم سرایت کولی شي.
