په تورخم کې دوشنبې شپې په جګړه کې دواړه خواوو پر یو بل د سپکو او درنو وسلو ډزې کړې، خو د مرګ ژوبلې په اړه یې کره جزییات نه شته.
زرګونه موټر له تېرو ۱۲ ورځو راهيسې د لارې تړل کېدو له امله د فرضي کرښې دې اړخ ته په تورخم کې ایسار دي او همدومره نور موټر د فرضي کرښې بل اړخ ته هم په دې تمه ولاړ دي چې ګوندې لار به خلاصه او دوی به توکي خپلو منزلونو ته ورسوي.
موټر چلوونکی آصف وايي: «دا ۱۱ مه ورځ ده چې زموږ موټر په تورخم کې ولاړ دي، هره ورځ د پاکستان له خوا ډزې کېږي. دلته ټرانسپورټ په عذاب دی، خلک په تکلیف دي او هرچا ته یې زیان رسېږي.»
یو بل موټر چلوونکی ګل محمد وايي: « زما موټر کې چرګان بار دي، له ۱۰ ډېرې ورځې کېږي، خو هېڅوک د لارې خلاصولو غم نه خوري. موږ له مزردوۍ وتلي یو او دلته په دې روژه کې مسافر پراته یو.»
په دغو موټرو کې د وچو او تازه مېوو ترڅنګ، غوښې، هګۍ او دېته ورته نور خوراکي توکي چې د ژر خرابېدو احتمال يې شته، بار دي.
موټر چلوونکي وايي، ۱۲ ورځې یې په تورخم کې تېرې کړې دي.
موټر چلونکی رحمت وايي: « موږ خپل ټرانسپورټ وایو چې دا لارۍ خرڅې کړئ، ترڅو موږ هم ترې خلاص شو. دا به تر کومه ادامه ولري چې هر کله پاکستان وغواړي، دروازه بنده کړي. موږ وایو، یا دغه دروازه د تل لپاره وتړئ یایې د تل لپاره خلاصه کړئ.»
دا په داسې حال کې ده چې تېرې دوه شپې په پرله پسې توګه په تورخم کې نښتې وشوې.
موټر چلوونکي وايي، دواړو خواوو ته په توکو بار موټر هم په مرميو لګېدلي دي.
په تورخم کې انتظار موټر چلوونکي له دواړو لوریو غواړي چې سیاست او سوداګري سره جلا کړي او لار دې خلاصه پرېږدي.
موټر چلوونکی آصف په دې اړه وايي: « زموږ لارۍ په مرمیو لګېدلې دي، زه یې ویډیوګانې لرم حتا کلینډر هم په کې ټپي شوی. موږ له مسوولینو غوښتنه کوو چې له پاکستان سره دا معامله یو طرف ته کړي. موږ غوښتنه کوو چې سیاست او تجارت سره بېل کړئ، ترڅو دروازه هره ورځ بنده نه شي.»
په ورته وخت کې د سوداګرۍ او پانګونکې خونه وايي، پر سوداګریزو توکو بار زرګونه موټر د تورخم لارې دواړو خواو ته ولاړ دي او په کې داسې خوراکي توکي بار دي چې ژر له منځه ځي او زیان یې ولس ته رسیږي.
د دغې خونې د مدیره پلاوي غړی خانجان الکوزی وايي، د تورخم لارې د بندېدو له لامله سوداګرو ته په میلیونونه ډالره زیان رسیدلی دی.
الکوزی زیاتوي:« په لارو کې بار توکي خرابېږي، دلته په بازارونو کې ګراني راځي، ډېمرېج او ډېټېنشن راځي. په دې کې ټرانزیټي مالونه دي، په دې کې مېوې دي او خوراکي توکي چې خرابېږي او په دې سره د افغانستان او پاکستان تجارت ته په میلیونونو ډالرو زیان رسېږي.»
د تورخم لارې د خلاصېدو په موخه د افغان او پاکستاني لوري ترمنځ ناستې هم وشوې، خو څه مثبته پایله یې نه درلوده. تر اوسه د لارې بندېدو راهیسې د دواړو خواوو ترمنځ دوه ځلې نښتې شوې چې مرګ ژوبله یې هم لرله.
