د افغانستان او ازبېکستان چارواکو د ترمذ په ګډ بازار کې سره ليدلي او د دواړو هېوادونو ترمنځ د سوداګرۍ او پانګونې په برخو کې پر شريکو مسايلو خبرې کړې.
په دې ناسته کې د صنعت او سوداګرۍ وزارت سرپرست او د ازبېکستان د پانګونې، صنعت او سوداګرۍ وزير ګډون درلود.
دوی دواړه د هغو ژمنو پر تطبيق غږېدلي چې تاشکند ته د ملا عبدالغني برادر اخوند د سفر پرمهال شوې وې.
په دې ژمنو کې د افغانستان په اقتصادي سکټور کې د ازبېکستان ۲۰۰ ميليونه ډالري پانګونه هم شامله ده.
د صنعت او سوداګرۍ وزارت وياند اخندراده عبدالسلام جواد وايي: « د افغانستان او ازبکستان ترمنځ تجارتي ناسته وشوه. په دې ناسته کې د صنعت او سوداګرۍ وزارت سرپرست نورالدین عزیزي او د ازبېکستان د پانګونې، صنعت او تجارت وزیر لزیز قدرت اوف ګډون درلود چې د ترمذ ښار په تجارتي مجتمع کې جوړه شوه. دغه ناسته د مخکېنۍ هوکړې له مخې او ازبېکستان ته د افغانستان اسلامي امارت د ریاست الوزرا اقتصادي مرستیال ملا عبدالغني برادر اخوند د سفر د ژمنو عملي کېدو په لړ کې ترسره شوه. په دې ناسته کې یو لړ مهم مسایل لکه د افغانستان په بېلابېلو اقتصادي برخو د مثال په توګه د حیرتان په بندري ښارګوټي کې د اقتصادي او سوداګریزې مجتمع جوړیدل، په بلخ، سمنګانو او کندوز ولایتونو کې تر ۲۰۰ میلیونو ډالرو د زیات لومړني ارزښت د خوراکي توکیو د تولید او پروسېس، د چرګانو د ساتنې او پالنې، د درمل جوړولو د صنایعو، د سېمنټو او ساختماني موادو تولید، بڼ جوړولو( د پستې د بڼونو پالنې) او د مېوو او سبزیجاتو د پروسېس په برخه کې د ازبېکستان هېواد پانګونه تر بحث لاندې ونیول شوه.»
د اقتصادي چارو یو شمېر شنونکي له ګاونډيو هېوادونو سره د اړيکو ټينګول، د اقتصادي ودې او د بهرنۍ پانګې جلبولو په برخه کې مهم بولي.
د اقتصادي چارو شنونکی عبدالنصیر رشتیا وايي: « زه فکر کوم هرڅومره چې دغه تګ راتګ زیات شي او هرڅومره ډېر چې له ګاونډیو او سیمه ییزو هېوادونو سره تجارتي او ټرانزیټي اړیکې پراخې شي، په همدې کچه به بهرني پانګوال تشویق شي چې په افغانستان کې پانګونه وکړي؛ ځکه چې افغانستان د فرصتونو هېواد دی او د سترو پانګونو د جذب ظرفیت لري. دغه کار به په پایله کې د لا ډېر اعتماد رامنځته کېدو او سیمه ییزې همپالنې سبب شي او دا به د ټولې سیمې او ګاونډ پر ګټه وي.»
ځينې نور بیا د شريکو اقتصادي مسايلو په تړاو د ورته ناستو ترسره کېدل د اقتصادي ودې لامل بولي، خو دې هدف ته د رسېدو لپاره سوداګرو ته د اسانتياوو رامنځته کولو او د ګمرکي تعرفو کمولو غوښتنه هم کوي.
د اقتصادي چارو شنونکی عبدالجبار ساپی وايي: « زموږ لپاره ازبېکستان ه یا د حیرتان بندر منځنۍ آسیا ته د ننوتلو دروازه ده. څومره چې امکانات برابرېږي او له دوی سره ښه تعامل او راکړه ورکړه کېږي، دا به د افغانستان پر ګټه وي. موږ کولی شو خپلو نږدې او ګاونډیو هېوادونو ته هغه توکي صادر کړو چې په افغانستان کې تولیدېږي او دوی ورته اړتیا لري. د مثال په توګه، موږ کولی شو خپله تازه ترکاري، سبزیجات او مېوې صادر کړو او دا به زموږ د کرنې برخه هم تقویه کړي.»
د افغانستان او ازبېکستاني چارواکو ترمنځ دا ناسته داسې مهال ترسره کېږي چې له دې وړاندې د رياستالوزرا اقتصادي مرستيال ملا عبدالغني برادر اخوند د يوه پلاوي پر مشرۍ ازبېکستان ته تللی و. نوموړي له ازبېکستاني چارواکو سره د کابل او تاشکند ترمنځ د سوداګرۍ اسانولو او پراختيا پر لارو چارو خبرې کړې وې.
