د ۷۳۷ کیلومټرو په اوږودوالي د هرات او کندهار ولایتونو ترمنځ د اوسپنې پټلۍ غځولو د سروې او تفصیلي ډیزاین چارې د يکشنبې پر ورځ (د سلواغې ۲۸ مه) رسما ً پيل شوې.
چارواکي وايي، په دې پروژه شاوخوا ۲۶۴ میلیونه افغانۍ لګښت راځي.
دوی زیاتوي، د امنیت له ټینګښت سره د هرات – کندهار ترمنځ د اورګاډي پټلۍ پروژې پلي کېدلو ته زمينه برابره شوې او په بشپړېدو سره به يې د افغانستان له لارې د توکو لېږد رالېږد اسانه شي او په دې توګه به افغانستان هم په سيمه کې له ټرانزيټي پلوه د پيوستون په مرکز بدل شي.
د اسلامي امارت ویاند ذبیح الله مجاهد وايي: « اوس به اسلامي امارت ګامونه اخلي چې دغه تقاطع بېرته وصل کړي. دا پرېکون چې د ایران، ترکمنستان، ازبېکستان، تاجیکستان او دېخوا پاکستان او کراچۍ له بندر سره له وصل قطع و، دا به بېرته وصل شي. د دې اساسي ګټې به دا وي چې افغانستان به د یوه ټرانزیټي هېواد په شکل، د دې ترڅنګ چې سړک لري جنوبي او مرکزي آسیا یې سره نښلولي، اوس به یو بل آفشن هم زموږ لاس ته راشي او د اوسپنې پټلۍ له لارې به هم دغه هېوادونه له یوبل سره وصل کړو.»
چارواکي دغه پروژه په انتقالاتو کې د چټکتيا او د لګښت سپمولو لپاره ډېره مهمه بولي او زياتوي چې دا پروژه به نږدې ټول افغانستان په نسبي توګه اقتصادي ودې ته ورسوي.
د ټولګټو وزارت د اوسپنې پټلۍ معین اسحاق صاحبزاده وايي: « دغه پروژه نه یوازې په سوداګریزه، ټرانزیټي، اقتصادي او صادراتي برخه کې سیمې سره نښلوي، بلکې له سیمه ییزو او نړیوالو هېوادونو سره د غوره او حسنه دوه اړخیزو اړیکو ساتلو لپاره اغېزمن فرصت ګڼل کېږي او ترڅنګ یې په کور دننه د بشري قوې په کار اچولو، د عوایدو زیاتولو او اقتصادي ثبات ته د هېواد رسولو کې مهم رول لوبوي.»
د خصوصي شرکت استازی جلات خان ابراهیمي وايي: « موږ به دغه پروژه د ټولګټو وزارت له خوا د راکړل شویو مشخصاتو او د نظارت کوونکو ټیمونو تر نظارت لاندې، د نړیوالو ستندردونو په پام کې نیولو سره بشپړه او ګټه اخیستنې ته وسپارو.»
سوداګر هم د دې پروژې سروې او ډيزاين چارو پيل کېدو له امله خوښ دي او هيله مندي ښيي چې د اورګاډي د دې کرښې له جوړېدو سره به سوداګري هم وده وکړي.
د کندهار د سوداګرۍ او پانګونې خونې مشر صدیق مومند وايي: « د افغانستان یو متر ځمکه او هر جنس چې قېمت شوی، لامل یې د قوشتېپې کانال، رېل ګاډي پټلیو او بندونو په څېر سترې پروژې دي او ورسره به افغانستان ورځ تر بلې پر پښو ودرېږي.»
د کندهار یو تن سوداګر حاجي عبدالاحد وايي: « د رېل ګاډي دغه پروژه به موږ او زموږ تولیدات تر نړۍ ورسوي او موږ به له نړیوالو بازارونو سره وصل کړي. دا یو حقیقت دی چې موږ د رېل ګاډي نه لرلو له امله د نړۍ په وروسته پاتې هېوادونو کې شمېرل کېږو.»
د دې پروژې د پيل کېدو په مراسمو کې چارواکو په نږدي راتلونکي کې د افغان ټرانس پروژې د عملي چارې د پيل کولو خبر هم ورکړ او وویل، د رېل ګاډي د دې پروژو په وسيله به پاکستان د افغانستان له لارې له ترکمنستان او ازبېکستان سره وصل شي.
