د فراه یو سوداګر د لومړي ځل لپاره په دې ولایت کې د ۲۲۰ زره امریکايي ډالرو په پانګونې سره د غير الکولي مشروباتو د توليد یوه فابریکه جوړه او په کار یې پيل وکړ.
دغه فابریکه په یوه ورځ کې ۲۵۰۰ بستې او په یوه میاشت کې ۷۵ زره بستې غیر الکولي مشروبات او معدني اوبه تولیدولی شي.
د فابریکې مسوولان که څه په فراه کې د پانګونې له امله خوښ دي، خو د ځينو ستونزو يادونه هم کوي.
د فابريکې رییس جواد غفوري وايي: « په فراه ولایت کې زموږ لویه ننګونه د برېښنا نه شتون دی. له اسلامي امارت غوښتنه کوو چې د برېښنا زمینه برابره کړي؛ ترڅو موږ وکولی شو د بوتلونو په څېر خام مواد خپله همدلته تولید کړو.»
په یاده فابریکه کې د ۴۰ کسانو لپاره په درېیو جلا شیفټونو کې په مستقیم ډول د کار زمینه برابره شوې.
فابریکه کې په کار بوخت کسان د کاري فرصتونو له برابرېدو خوښ دي او له نورو سوداګرو هم غواړي چې په هېواد کې پانګونه وکړي.
د څښاک تولیدوونکې فابریکې کارګر محمد آصف وايي: «زه خوښ یم چې دلته راته د کار زمینه برابره شوې؛ که دا ځای نه وای، زه ښايي بهر ملکونو ته وتلی وای. اوس چې په هېواد کې امنیت ټینګ شوی، زه نورو پانګوالو هم غوښتنه کوم چې دا ډول پانګونې وکړي او ځوانانو ته د کار زمینه برابره کړي.»
د فابریکې یو بل کارګر رحیم گل وايي: « ډېره خوشاله یم چې موږ ځوانانو ته د کار زمینه برابره شوې. له نورو تجارانو مې هم همدا غوښتنه ده چې په افغانستان او ځانګړې توګه فراه ولایت کې دا ډول شرکتونه فعال کړي؛ ترڅو زموږ ځوانان په کار شي او مجبور نه وي چې نورو هېوادونو ته لاړ شي.»
د فراه د صنعت او سوداګرۍ ریيس وایي، هڅه کوي یاد ولایت کې د سوداګرو لپاره د پانګونې زمینه پراخه او پر وړاندي یې شته ستونزې هوارې کړي.
د فراه د صنعت او سوداګرۍ رییس شمس الحق اجمل وايي: « د برېښنا په برخه کې باید ووایم چې سروې بشپړه شوې او له ترکمنستان هېواد څخه به فراه ولایت ته برېښنا راځي. که خدای کول په لنډ وخت کې به فراه ولایت له برېښنا برخمن شي.»
د ځايي چارواکو د معلولوماتو له مخې، دا مهال په فرا کې له ۴۰ زیاتې تولیدي فابريکې فعاليت کوي چې خوراکي او غیر خوراکي مواد تولیدوي او له امله یې سلګونه کسانو ته د کار زمینه هم برابره شوې ده.
