د ریاست الوزرا د اقتصادي مرستیال ملاعبدالغني برادرآخوند پر مشرۍ د ملي تدارکاتو کمېسیون نوبتي ناسته د شنبې پر ورځ د (۱۴۰۳ کال د لړم پر ۲۶ مه) ترسره شوه.
اقتصادي مرستیالۍ پر خپله اېکس پاڼه لیکلي، ناسته کې د شاوخوا ۵ میلیارده افغانیو په ارزښت د ۲۷ پروژو قراردادونه منظور او د ۸ نور یې تعدیل کړل.
اقتصادي مرستیالۍ زیاته کړې، ناسته کې د اتو پروژو د قراردادونو د قېمتونو په اړه ټاکل شویو کمېټو ته دنده سپارل شوې چې له ګټونکو شرکتونو سره بیا مذاکرات ترسره او خپل راپور د ملي تدارکاتو کمېسیون مشرتابه ته وړاندې کړي.
د اقصادي مرستیالۍ په خبره، په منظور شویو او تعدیل شویو پروژو کې د سلطان بند بیارغونه، په کابل ښار کې د تهیه مسکن د دویم نمبر بلاکونو جوړول، د لوګر او کندهار د استیناف محکمو لپاره ودانۍ، د کابل ښار یوشمېر داخلي سړکونو جوړول، په بېلابېلو ولایتونو کې د اړتیا وړ برېښنايي وسایلو چمتو کول او یوشمېر نورې پروژې شاملې دي.
دغه راز په ناسته کې ۲۰ نورې پروژې چې تایید ته وړاندې شوې وې، تعدیل او ځنډول شوې دي.
د اسلامي امارت مرستیال ویاند حمدالله فطرت په دې اړه وايي: « د ملي تدارکاتو نوبتي غونډه د ریاست الوزرا د اقتصادي مرستیال ملاعبدالغني برادر اخوند پر مشرۍ ترسره شوې چې له اجنډا سره سم، ۴۷ پروژې د منظورۍ لپاره وړاندې شوې وې چې له ډلې یې د ۲۷ پروژو قراردادونه چې شاوخوا ۵ میلیارده افغانۍ ارزښت لري، منظور شول او پاتې نور یې ځینې تعدیل او ځینې وځنډول شول. په منظور شویو او تعدیل شویو پروژو کې د غزني ولایت د سلطان بند بیا رغونه، په کابل ښار کې د تهیه مسکن دویم نمبر بلاکونه، د لوګر او کندهار ولایتونو د استیناف محکمو تعمیرونه، د کابل ښار یو شمېر داخلي سړکونه، په مختلفو ولایتونو کې د برېښنا د اړتیا وړ وسایل او یو شمېر نورې پروژې شاملې دي چې د اسلامي امارت له لوري به تمویلېږي.»
د اقتصادي چارو شنونکي په دې باور د ي چې بنسټیزې اقتصادي پروژې د هېواد په اقتصاد کې مهم رول لري.
دوی وايي، د دغه ډول پروژو پلي کول نه یوازې خلکو ته د کار زمینه برابروي، بلکې نورې پانګونې ته هم لار پرانیزي.
دوی غوښتنه کوي چې د بنسټیزو اقتصادي پروژو پلي کولو ته باید جدي پاملرنه وشي او هغه پروژې چې په مستقیم ډول د هېواد د پرمختګ او د خلکو له اقتصاد سره تړلې دي، باید د پلي کېدو لپاره یې کار وشي.
د اقتصادي چارو شنونکی نورالله عزیز وايي: « ستراتیژيکي زیربنايي اقتصادي پروژې کولی شي د هېواد په اقتصادي پرمختګ کې مهم رول ولوبوي؛ ځکه دغه پروژې نه یوازې دا چې خلکو ته د کار زمینه برابروي، بلکې کولی شي د نویو پانګونو لپاره هم زمینه برابره کړي. د دغو پروژو د خامو موادو لپاره اړتیا ده چې نوې پانګونې وشي، د دوی پاخه مواد باید په بازارونو کې د اجناسو په توګه وپلورل شي.»
ځینې نور بیا وايي، د ټاپي، کاسا زر، ټاپ او افغان ټرانس په څېر د سترو اقتصادي پروژو ترڅنګ ګڼ شمیر نورې بنسټیزې پروژې لکه د اوبو او برېښنا بندونه، د هېواد حلقوي سړکونه، د سترو ښارونو داخلي سړکونه، د تولیدي کارخونو بیا فعالول او دېته ورته نورې پروژې کولی شي د هېواد اقتصاد ته وده ورکړي او د خلکو ژوند ورسره ښه شي.
د اقتصادي چارو شنونکی عبدالجبار ساپی وايي: « د افغانستان په اقتصاد کې سترې ملي پروژې ټاپي، کاسا زر، افغان ټرانس او د مس عینک په څېر نورې سترې پروژې د افغانستان لپاره ډېرې مهمې دي. همدارنګه د سړکونو په څېر نورې پروژې او د سترو کارخونو فعالول، د خصوصي سکټور لپاره د پانګونو د امکاناتو برابرول په اقتصاد کې ډېر مهم رول لري.»
د تدارکاتو ملي کمېسیون له لوري منظورې شوې ۲۷ پروژې د سرپرست حکومت له لوري تمویلیږي او ارزښت یې ۵ میلیارده افغانۍ ښودل شوی.
دا مهال د قوشتپې کانال ترڅنګ ګڼ شمېر نورې سترې پروژې چې د هېواد لوی حلقوي سړکونه هم په کې شامل دي، تر کار لاندې دي او بودیجه یې د افغانستان له کورنیوعوایدو ورکول کېږي.
